Gæfusmíði

Það er upplífgandi að verða hissa. Það er eins og mann kítli örlítið í innyflin. Hér kemur örstutt samantekt sem gæti vakið undrun og forvitnilegar spurningar.

Þann 7. september 2011 var félagið Caramba-hugmyndir og orð ehf. tekið til gjaldþrotaskipta samkvæmt frétt í Viðskiptablaðinu. Það fylgdi og að hæstu skuldirnar hafi verið á Björn Inga Hrafnsson (BIH) og félag hans, um 563 milljónum króna í lok september 2008.

4. apríl 2012 birtist frétt í Morgunblaðinu þar sem fram kemur að skuldirnar voru nokkru meiri en í upphafi var talið og vitnar Morgunblaðið í auglýsingu úr Lög­birt­ing­ar­blaðinu að „kröf­ur í búið hafi numið sam­tals 773,7 millj­ón­um króna. Eig­andi fé­lags­ins er Björn Ingi Hrafns­son, sem er einn af eig­end­um Vefpress­unn­ar… Eign­ir voru í bú­inu en mikið vantaði upp á að þær dygðu fyr­ir kröf­um.“

Þann tólfta apríl 2012 er þetta að finna í DV: „Fjallað var um þessi viðskipti Björns Inga við Kaupþing í skýrslu rannsóknarnefndar Alþingis. Björn Ingi var þar efstur á blaði á lista yfir lánveitingar til fjölmiðlamanna með 563 milljónir króna á bakinu. Þar kom meðal annars fram að í september 2008 hefði félagið fjárfest í hlutabréfum í Exista, stærsta hluthafa Kaupþings. Björn Ingi vill ekki tjá sig um það aðspurður af hverju hann fjárfesti í Exista rétt fyrir bankahrunið. „Ég ætla ekki að tjá mig neitt um þetta. Ég ætla ekki að vera að ræða eitthvað sem gerðist fyrir mörgum, mörgum árum.“ Hann segir að umtalsverðar fjármunir falli á sig út af gjaldþrotinu. „Svona er þetta; þetta fór bara svona. Það er umtalsvert sem fellur á mig persónulega út af þessu. Svona gengur lífið,“ segir Björn Ingi.“

Svo fór landið að rísa eftir gjaldþrot og hundruð miljóna króna tap. 24. nóvember 2014 greinir Vísir.is frá því að verið sé „að gagna frá samningum um kaup á útgáfufélagi DV. Tilkynnt verður um þetta síðar í dag, samkvæmt heimildum Vísis. Samkvæmt sömu heimildum er það Björn Ingi Hrafnsson, útgefandi Vefpressunnar, sem á og rekur þrjá vefmiðla, sem er í forsvari fyrir kaupendur. Þann 17.12. staðfestir Morgunblaðið þetta undir fyrirsögninni „Björn Ingi stjórn­ar­formaður DV.“

***

Millispil:
Haft eftir Birni Inga Hrafnssyni í Nútímanum 2. Júní 2015: „Forsætisráðherra fjármagnaði ekki kaup Pressunnar á DV. Hann á ekki hlut í blaðinu.“

***

Öllum að óvörum kom í ljós að það virðist gott upp úr því að hafa að reka blöð og fjölmiðla. Það tókst BIH að minnsta kosti. Þann 28. Júlí 2015 er landsmálavefurinn Skutull með svohljóðandi fyrirsögn: Björn Ingi keypti DV og nú Vestfirði og ellefu önnur blöð. Í þessum viðskiptum eignaðist Vefpressa BIH meðal annars vikublöðunum Akureyri, Reykjavík og Vestfirði.

Og nú fáum árum eftir 773 miljón króna gjaldþrot Caramba-hugmyndir og orð ehf. berast fréttir af því að  Björn Ingi sé búin að kaupa fataverslunina JÖR og eigi í viðræðum um kaup á Bókabúð Máls og menningar.

BIH er aðaleigandi Eyjunnar.is Það er öflugur fréttavefur sem er með sjónvarpsútsendingar í samvinnu við Stöð 2. Sá þáttur auglýsir sig svo á eigin vef:

Eyjan er vandaður þjóðmála- og fréttaskýringaþáttur um pólitík og efnahagsmál í opinni dagskrá í umsjón Björns Inga Hrafnssonar og blaðamanna Eyjunnar. Í þættinum verður leitast við að skýra helstu fréttamál samtímans með málefnalegum og upplýsandi hætti. Fjölmiðlamenn kryfja átakamál til mergjar og fólk úr stjórnmála- og viðskiptalífinu svara spurningum um það sem skiptir máli í samfélaginu.

Það er bara gott og gleðilegt þegar mönnum gengur vel að hafa sig upp úr gjaldþrotum og komast í álnir. En hvaðan koma peningarnir sem duga til? Miljónamæringurinn Sigmundur Davíð Gunnlaugsson, fyrrverandi forsætisráðherra á að minnsta kosti ekkert í DV ef marka má umsvifamanninn BIH. En þar sem þetta er forvitnilegur vöxtur, efnahagslega, væri fróðlegt, gagnlegt og gaman ef Eyjan sem er vandaður þjóðmála- og fréttaskýringaþáttur um pólitík og efnahagsmál skýrðu með upplýsandi hætti hvaðan BIH fékk peninga til þess að rífa sig upp úr gjaldþroti. Ef stjórnarformaðurinn léti verða af þessu og segði satt og rétt frá í öllum greinum trúi ég að magur yrði hissa undir frásögninni.