Froða

 

Þegar hæfir stjórnendur átta sig á að þeir hafa ekki staðið sig sem skyldi líta þeir yfir unnin verk í leit að því sem miður fór. Vanhæfir stjórnendur fara öðruvísi að. Þeir svipast um eftir sökudólg því að sjálfir gera þeir aldrei neitt rangt.

 

Forsætisráðherra landsins er vanhæfur stjórnandi. Hann er líka froðusnakkur. Fólk er farið að sjá í gegn um hann og hann tapar fylgi hjá þjóðinni. Nú hefur hann ákveðið að lappa upp á fylgið. En ekki með því að leiðrétta villur sínar. Hann þegir um þær, rær á vinsældarmiðin, skynjar megna óánægju fólks með bankana og ákveður að skipa sér þar í raðir. Til að afla sér vinsælda. Verða maður fólksins. Talar hátt og víða og notar stór orð svo eftir er tekið. Fjölmiðlar birta froðuna úr honum. Gagnrýnislaust. Enn sem komið er.

Ráðherrann birtir grein í Fréttablaðinu í dag. Hún er merkt honum.  Og sögð eftir hann. Hún er athyglisverð vegna þess hve ómerkileg hún er. Hún byrjar svona:

¨Eitt hundrað milljarða hagnaður bankanna (80 milljarðar eftir skatta) á árinu 2014 er áminning um þau mistök sem gerð voru við endurreisn bankanna eftir hrun. Vegna ákvarðana sem þá voru teknar er bankakerfið of stórt og ávinningur af endurmetnu lánasafni kemur að mestu leyti í hlut kröfuhafa Arion banka og Íslandsbanka en ekki ríkisins sem þó bar áhættuna af endurreisninni.“

Hvað gerir forsætisráðherra landsins í þessum línum: Hann slumpar á hagnað bankanna, segir að skattaprósenta þeirra sé 20% og fullyrðir að bankakerfið sé of stórt vegna rangra ákvarðana í kjölfar Hrunsins. Hann blessar þá gjörð að innheimtar séu fullar greiðslur af verðfelldum lánum alþýðu manna bara ef ríkið hefði gert það en ekki útlendingar.

Hann segir þetta líka forsætisráðherrann: „Arðsemi eigin fjár bankanna er langt umfram það sem aðrir atvinnurekendur eiga að venjast …“

Er þetta svona? Hefur ráðherrann ekki séð ársreikninga stórútgerðarinnar? Ekki stórgróða Ríó –Tintó sem falsaður er niður í tap eftir sérstökum lánaleiðum sem liggja frá þeim sjálfum til þeirra sjálfra? Hann fullyrðir eitt, sýnir ekki fram á neitt, síst réttmæti orða sinna. Hann bullar.

Sigmundur Davíð veit að þorri fólks er reiður út í bankana. Hann ætlar að nota sér það til þess að afla sér vinsælda. Til að stoppa fylgishrunið hjá Framsóknarflokknum. Þess vegna sagði hann í hádegisfréttum Ríkisútvarpsins að nauðsynlegt sé að breyta eignarhaldi bankanna. Hann nefndi hins vegar ekki hvernig ætti að breyta og heldur ekki hvaða bönkum, tiltók hvorki Mp-banka vina sinna, Landsbanka okkar allra né Arion í þessu sambandi. Enda engin innistæða fyrir orðunum. Þau eru froða. Vinsældarveiðar.