Fréttanöldur

Ég verð víst að játa að ég er svona frekar neikvæður að eðlisfari og geri talsvert af því að tuða og nöldra yfir öllu og engu.

Að sama skapi hef ég verið hálfgerður fréttafíkill frá því ég var krakki.

Þess vegna liggur beint við að nöldra yfir fréttum og óskiljanlegt að ég hafi ekki byrjað á þessu fyrir löngu.

Ég sit gjarnan og tuða yfir hálfum fréttum, sofandi fréttamönnum sem kveikja ekki á augljósum spurningum, leyfa viðmælanda að svara út úr kú og þar fram eftir götum. Reyndar hef ég ákaflega lítið þol fyrir fréttum af fína-og-fræga fólkinu annars vegar og fréttaleysum („human interest stories“) hins vegar.

Ég vil satt að segja meira gaman af fréttaskýringum en fréttum, Spegillinn á Rúv er fín nálgun (þó oft mætti vanda betur til) og ég hef gaman af innskotum Boga af erlendum vettvangi.. sem og Viðtölum.

Ég hef reyndar verið svo heppinn að fá að vinna með stærstu fréttastofum landsins, kynnst þar mikið af góðu fagfólki – sem stendur sig að jafnaði mjög vel. Ég er ekki og ætla alls ekki að gera lítið úr því. Og ég blæs á þetta tal um hlutdrægni. Og ég geri mér líka grein fyrir að álagið er mikið og sjaldnast nægur tími til að vinna fréttir alla leið.

Ég vil sem sagt ekki að þeir sem ég gagnrýna taki þessu persónulega eða sem einhvers konar dóm yfir fagmennsku, þetta eru aðeins ábendingar um smáatriði (svona í flestum tilfellum) sem mættu betur fara.

Og ég er alls ekki að þykjast hafa einhverja faglega þekkingu, þetta er bara álit nöldur neytandans.

Þannig að… ætli ég byrji ekki á tveimur tilfellum.

Annars vegar forsíðufrétt Fréttablaðins um að iPhone hefði einhvern vinning. Við nánari lestur kom í ljós að þetta var samantekt á því hvers konar símtæki ráðherrar hafa valið sér. Getur mögulega fundist einhver lesandi sem hefur áhuga á því hvaða vörumerki tiltölulega fámennur þjóðfélagshópur hefur valið sér til að tala í símann?

Hitt er stórfrétt í aðalfréttatíma Rúv um ellilífeyrisþega sem fóru að skoða traktora í stað þess að prjóna. Í Danmörku vel að merkja, ekki einu sinni hér á landi. Gott og vel, ég veit að ég hef minna þol en flestir fyrir svona fréttum, en að þrítaka þetta í aðalfréttatíma sjónvarpsins hlýtur að vera einhvers konar met.