Frelsi til sölu: Opinn fangaklefi til leigu á sjötíuþúsundkall á mánuði

Húsnæðismarkaðurinn á höfuðborgarsvæðinu tekur á sig ýmsar myndir.

Ein þeirra er 6-7 fermetra kjallaraherbergi til leigu á sjötíu þúsund krónur á mánuði. Það er auglýst á síðu á facebook sem kallast ´Leiga´.

Með herberginu fylgir aðgangur að eldhúsi, baðherbergi og netsambandi.

Herðubreið hefur áður og nýlega fjallað um ýmis kostakjör sem bjóðast á leigumarkaðnum í Reykjavík og nágrenni.

Þetta slagar þó næst því skrautlegasta, sem þar er að finna, rúmlega tíu þúsund krónur á fermetrann. Með sömu verðlagningu mætti bjóða 80-90 fermetra hæð til leigu á eina milljón króna á mánuði. Með eigin baðherbergi. Og eigin eldhúsi. En varla með nettengingu. Skárri væri nú heimtufrekjan.

Einn í hópnum á facebook, sem heitir Ingólfur Arnar, er þó ekki upprifinn yfir þessu ágæta tilboði og býður fram þessa skoðun:

„70.000kall!!!!! Og þetta er nákvæmlega eins og fangaklefi!!! Djöfulsins viðbjóður. Frekar léti ég stinga mér inn á Hólmsheiði.“

Herðubreið sýnist eftir skoðun ljósmynda að Ingólfur hafi talsvert til síns máls. Sá er þó munurinn, að þessi fangaklefi er opinn. Í það minnsta virðist mega skríða út um kjallaragluggann og út í garð.

Leigusalinn, sem heitir Þröstur Guðlaugsson, lætur sér þennan dóm í léttu rúmi liggja og svarar að bragði: „Býrðu ekki þar núna?“

Hvernig sem því er háttað, þá er ólíklegt að þeir Ingólfur nái saman, því að Þröstur vill einkum fá sem leigjanda snyrtilega, reglusama og trausta konu.

Og líklega verður honum að ósk sinni og farsæl viðskipti komast á, því að þegar þetta er skrifað hafa allmargar svarað. Þær eiga raunar flestar sameiginlegt, að bera erlend fornöfn og ættarnöfn, hvaða ályktun sem draga má af því.

En þannig gerast semsagt kaupin á Eyrinni í Reykjavík í norræna velferðarsamfélaginu á góu árið 2017.