trusted online casino malaysia
Ritstjóri Herðubreiðar 01/02/2016

Framsóknarflokkurinn veldur heilaskaða í ungum börnum. Hverjum dettur í hug að tala með þessum hætti?

Framsóknarflokkurinn veldur heilaskaða í ungum börnum. Margt bendir til þess að það að sitja undir málflutningi framsóknarmanna geti haft skaðleg áhrif á heila hlustenda sem í mörgum tilfellum getur verið erfitt að snúa við. Flestir leiðtoga Framsóknarflokksins vita auk þess sjálfir mætavel að áróðurinn er bara hættulegar lygar og blekking, en samt halda þeir uppteknum hætti í trássi við betri vitund bara af því að þeir kunna ekki að hætta þessu.Davíð Þór Jónsson

Þetta sagði séra Davíð Þór Jónsson í prédikun í Fáskrúðsfjarðarkirkju í gær, 31. janúar. Hann bætti við hinu augljósa:

„Vonandi blöskrar ykkur málflutningur af þessu tagi. Þau ykkar sem hlógu gerðu það vonandi út af því hvað hann var fáránlega öfgakenndur. Ég held að það skipti engu máli hvar maður er í pólitík, þegar svona er talað segir það meira um mælandann en umræðuefnið. Ég held að jafnvel einörðustu andstæðingum Framsóknarflokksins þætti málstað sínum lítill greiði gerður með svona glórulausri rætni og ofstæki.“

En þessi óvenjulegi inngangur að prédikun var þó ekki tilviljun. Hann er nánast orðrétt hafður eftir Magnúsi S. Magnússyni prófessor við Háskóla Íslands í nýlegu útvarpsviðtali, þar sem umræðuefnið var enginn stjórnmálaflokkur, heldur þjóðkirkjan. Davíð Þór bætti við:

„Ef einhver segði að islam snerist aðeins um græðgi og lygar yrði viðkomandi væntanlega með réttu strax úthrópaður sem rasisti og íslamófób. Ef einhver segði að Samtökin 78 yllu heilaskaða væri viðkomandi aðeins að afhjúpa sjálfan sig sem kjána og hómófób. En þegar sagt er að Þjóðkirkjan valdi heilaskaða er það kynnt sem snörp og réttmæt ádeila á staðnaða ríkisstofnun en ekki það sem það augljóslega er; heimskuleg fóbía. Kirkjan þarf að una því að ummælum um hana – sem brytu í bága við löggjöf landsins um hatursorðræðu ef þau væru um einhverja aðra – sé hampað sem róttækni og réttsýni.“

Herðubreið er ekki trúarlegt tímarit – víðs fjarri því – en samt þeirrar skoðunar að flestum sé til heilabata að lesa prédikun séra Davíðs Þórs hér.

 

Flokkun : Efst á baugi
1,594