Ritstjóri Herðubreiðar 23/09/2016

Framsóknarflokkurinn langöflugastur í kjördæmi Sigurðar Inga

Fylgi Framsóknarflokksins mælist hvergi meira en í suðurkjördæmi, þar sem Sigurður Ingi Jóhannsson forsætisráðherra er oddviti flokksins.Sigurður Ingi Jóhannsson

Þetta kemur fram í umfangsmikilli könnun Capacent Gallup, sem Herðubreið hefur aðgang að.

Rúmum mánuði fyrir alþingiskosningar mælist Framsóknarflokkurinn með um 20 prósent atkvæða í suðurkjördæmi, næstum tvöfalt fylgi sitt á landsvísu.

Í hinum landsbyggðarkjördæmunum tveimur hefur flokkurinn í kringum 14-15 prósent, vel innan við helming þess sem flokkurinn fékk þar í síðustu kosningum. Þar eru oddvitar flokksins Sigmundur Davíð Gunnlaugsson og Gunnar Bragi Sveinsson.

Stuðningsmenn Sigmundar Davíðs til áframhaldandi formennsku í flokknum, þar á meðal Gunnar Bragi, hafa haldið því fram að fylgi flokksins hafi styrkst frá því að formaðurinn sneri aftur til þings. Þessi könnun gengur þvert gegn þeim málflutningi, en flokkurinn stendur samkvæmt mælingunni höllum fæti alls staðar nema í suðurkjördæmi.

Staðreyndavakt Kjarnans hefur einnig hrakið þetta sjónarmið Gunnars Braga og segir hann fara með fleipur.

Allmörg félög framsóknarmanna hafa skorað á Sigurð Inga að bjóða sig fram til formanns gegn Sigmundi Davíð, þar á meðal framsóknarmenn í Borgarfirði, Austur-Húnavatnssýslu og Árborg. Sveinbjörn Eyjólfsson á Hvanneyri hefur lýst yfir framboði, en kveðst draga það til baka ef Sigurður Ingi gefur kost á sér.

Framsóknarmenn í suðurkjördæmi halda kjördæmisþing sitt um komandi helgi og væntanlega dregur þar til tíðinda í formannsmálum. Viku síðar halda framsóknarmenn svo flokksþing sitt, þar sem greidd verða atkvæði um forystuna.

Í þessari sömu könnun Capacent kemur fram að fylgi Framsóknarflokksins í höfuðborgarkjördæmunum þremur er við bjórstyrk, eða í kringum fimm prósent.

Flokkun : Efst á baugi
0,827