Framsókn dormar á facebook. Sá sem skrifaði síðustu færslu sagði sig úr flokknum vegna „þjóðernisíhaldssemi“ hans

Stjórnmálamenn og -flokkar nýta sér samfélagsmiðla í æ ríkara mæli til að koma stefnu sinni, hugmyndum og skilaboðum til kjósenda. Þetta virðist þó ekki eiga við um Framsóknarflokkinn í Reykjavík.

Síðasta færsla á facebook-síðu flokksins í höfuðborginni er skrifuð 29. maí 2010. Hana skrifaði Einar Skúlason sem var þá oddviti flokksins í borgarstjórnarkosningum og vildi minna kjósendur á að ekki væri hægt að kjósa eftir á. Færslan fékk tvö „læk“ en flokkurinn engan borgarfulltrúa.

Einar sagði sig úr Framsóknarflokknum ári síðar með þeim orðum að hann ætti ekki lengur samleið með honum. Hann kvaðst greina í flokknum ákveðna „tegund af þjóðernisíhaldssemi sem mér hefur þótt vaxandi hjá flokknum og ég kann mjög illa við enda hef ég alltaf verið alþjóðlega þenkjandi.“

Einar var á þessum tíma einnig varaþingmaður Vigdísar Hauksdóttur, en sagði af sér sem varaþingmaður með bréfi til forseta alþingis.

Uppfært: Forsvarsmenn Framsóknarflokksins vilja benda á að virka facebook-síðu megi finna undir „Framsókn og flugvallarvinir.“