Ritstjóri Herðubreiðar 28/04/2014

Framliðnir færa út kvíarnar: Bein útsending frá miðilsfundi á facebook. Gúgltækir eru vinsælir

Í takt við kröfur tímans eru miðilsfundir nú haldnir í beinni útsendingu á facebook. Síðdegis í gær fór einn slíkur fram og var forvitnilegur.Miðilsfundur

Miðillinn byrjar á að taka fram að miðlarnir séu þrír og alþjóðlegir, og því sé þetta eins konar fjölmiðlafundur (Herðubreið biðst forláts á þessum ósmekklega orðaleik):

„í kvöld erum við 3 miðlar, og er það ég Júlíana Íslendingur, Lissi Dansker og Tine sem er bæði Dani og Norðmaður. Ég mun byrja og vera ca. 30 mínutur, og síðan tekur Lissi við, eftir Lissi tekur Tine við.“

Öllum spurningum um miðilsfundinn, danskt málfar og annað, skal þó beina til Sigrúnar Pálmadóttur.

Fundurinn hefur skilað árangri, ef merkja má þessi tvö innlegg:

„Ég svosem skil ekki alveg hvernig þetta virkar þessir miðilsfundir hérna, en langar að spurja: kona á ca. 60/ 70 ára aldri og segjir hún ég dó úr krabba, en ég reykti líka mikið segjir hún það var lungun sem gáfu sig, getur verið að þessi kona hafi átt heima í sveit ? gæti þá hafa verið frá næsta bæ þar sem ég ólst upp.“

„Kom þarna í gegn einhver sem var farinn sem á 3 börn og brúðkaupsafmæli bráðum getur þetta verið eigin maður vinkonu minnar?“

Það er Gísli Ásgeirsson sem vekur athygli á þessari nýjung í íslenskri handanmiðlun í grein í gær. Þar kemur fram að miðillinn vill ekki láta trufla sig á meðan hún/þau eru í sínu standi á facebook:

„Ég vinn þannig að ég skrifa hérna á viðburðinn miðlunina að handan. Ef þið þekkið þann láttna meigið þið gera líka/like og ef þið eruð viss um að þið þekkið þann látna, þá megið þið skrifa í einkaskilaboðin mín, taka afrit af því sem ég skrifa og senda mynd af þeim látna. Ég vil biðja ykkur um að ekki trufla á meðan ég er að miðla, og ekki skrifa heldur á vegginn.“

Gísli bætir við:

„Síðasta setningin er sannfærandi. Miðill sem er í svo góðu sambandi við handanheima að skrif á fésbókarvegg trufla hann, hlýtur að vera góður. Þrátt fyrir þennan fyrirvara og brýningu, tilkynntu margir fundargesta komu sína með skrifum og voru ávíttir harðlega.

Það gerðist reyndar líka á síðasta miðilsfundi en þá kom einkum fram látið fólk sem hægt var að gúgla, þ.e. sem hafði látist í slysum sem höfðu ratað á síður dagblaða eða netmiðla. Þeir sem voguðu sér að benda á þetta, voru líka víttir harðlega, því góður miðill þarf ekki að gúgla og auðvitað helber tilviljun að þeir sem komu fram, voru allir gúgltækir. […]

Framhaldið veltur svo á trúgirni og vilja fólks til að opna veskið sitt, því ekkert í þessum efnum er ókeypis, nema þessi fyrsti fundur á opnum fésbókarvegg.“

Flokkun : Efst á baugi
1,244