Framhaldið veltur á hinum. Skiptir miklu að þeir séu staðfastir og veiti ekki flokki af þessu tagi völd

„Með því tala inn í útlendinga- og múslimahatur eru framsóknarmenn alls ekki að taka mið af norrænni reynslu heldur að hunsa hana. Með því að orða fordómana og hatursáróðurinn eins og hann birti skynsamlegar og ígrundaðar áhyggjur, gefa þeir öfgahópunum kærkomnar réttlætingar á skoðunum sínum og þeir fitna fyrir bragðið eins og púkinn á fjósbitanum. Þannig birtist hatursorðræðan á lymskulegri og hættulegri hátt heldur en í vanstilltum fúkyrðaflaumi.“

Þetta skrifar Jón Ólafsson prófessor við Háskólann á Bifröst í grein í Herðubreið og leggur þar ígrundað orð í belg umræðu síðustu daga. Hann bendir á að framhald málsins velti ekki eingöngu á Framsóknarflokknum, heldur ekki síður öðrum flokkum:

„Þó að öfgahópar geti skaffað flokkum það fylgi sem þeir þurfa til að koma fulltrúum að, þá skiptir það litlu máli ef hinir eru staðfastir. Þess vegna veltur framhald útlendinga- og múslimahatursins sem Framsóknarflokkurinn hefur verið að næra sig á ekki á framsóknarmönnum heldur á því að það sé alveg klárt að hinir ætla ekki sætta sig við það og ekki að freistast til að veita flokki af þessu tagi völd.“

Jón Sigurðsson, fyrrverandi formaður Framsóknarflokksins og fyrrverandi rektor á Bifröst, kvaðst í fréttum í gær hafa áhyggjur af þróun mála innan Framsóknarflokksins, þar sem formaður flokksins hefði tekið undir sjónarmið oddvitans í Reykjavík og þar með gengið gegn stefnu flokksins til áratuga.

Grein Jóns Ólafssonar má lesa hér.