Forstjóri Landspítala: „Kostnaðurinn verður ekki minni þótt maður áætli hann lægri.“ – Algert skilningsleysi og spírall undirfjármögnunar

„Í morgun var ég ásamt framkvæmdastjóra fjármálasviðs boðaður á fund fjárlaganefndar Alþingis til að veita upplýsingar um áhyggjur okkar og mat á stöðu mála.“

Þetta skrifar Páll Matthíason forstjóri Landspítalans í grein á vef spítalans. Hann bætir við meðal annars:

„Þar útskýrðum við það, að þrátt fyrir þá fjármuni sem til spítalans hafa runnið síðustu tvö árin og við metum mikils, þá er staðreyndin sú að enn vantar töluvert upp á að fjármögnun spítalans sé í samræmi við verkefni. Framkoma forystu fjárlaganefndar og skilningsleysið á þörfum þeirrar grunnþjónustu fyrir almenning sem sjúkrahúsið veitir olli mér vonbrigðum. Vonbrigðum í ljósi mikilvægis og umfangs málaflokksins og þess skýra vilja þjóðarinnar sem kemur fram í skoðanakönnun eftir skoðanakönnun; að forgangsraða eigi í þágu heilbrigðisþjónustunnar umfram annað.“

Páll lýsir þessum viðhorfum forystu fjárlaganefndar ekki frekar, en formaður hennar er Vigdís Hauksdóttir og varaformaður Guðlaugur Þór Þórðarson.

Páll segir ennfremur:

„Vegna löngu fyrirsjáanlegra breytinga á samsetningu þjóðarinnar eykst álag á spítalann mjög ár frá ári. Hins vegar er ekki gert ráð fyrir auknu álagi í fjárlögum svo spítalinn fær í raun á sig 1,7% sparnaðarkröfu á ári (meðalálagsaukning per ár frá 2010) og allt það fé sem við fáum inn byrjar í rauninni á að mæta því aukna álagi. Þannig er orðinn hér spírall undirfjármögnunar sem erfitt er að vinda ofan af nema menn horfist í augu við staðreyndir.“

Og: „Kostnaðurinn verður ekki minni þótt maður áætli hann lægri.“