Úlfar Þormóðsson 01/01/2015

Forspá?

 

Herra forsetanum finnst að þegnarnir veiti því ekki næga athygli sem vel er gert. Þeir séu of gagnrýnir. Of neikvæðir. Samt er það svo að þeir velja sér mann ársins af verðleikum hans og samverkamanna hans, tala um það og skrifa um það. Þeir gleðjast yfir góðum bókum Gyrðis og Ófeigs og jafnvel lakri bók Guðbergs. Þeir fagna frábærum tónlistarmönnum. Þeir húrra fyrir íþróttamönnum sínum. Þeir eru þakklátir blaðamönnum sem sýna þrautseigju og koma upp um bósana, til dæmis forystumanninn sem sagði með þjósti að það sem hann hafði sagt í kosningabaráttu væri ekki til umræðu að kosningum loknum. Þeir hrósa stjórnarherrum ef þeir gera eitthvað af viti. Ef og þegar. En hann veit ekki af þessu, forsetinn, hann fylgist ekki með því sem þegnarnir aðhafast, fær aðeins nasasjón af því í endursögn viðhlæjenda sinn                     a.

 

En hér gæti verið jákvætt innlegg fyrir herra forsetann. Einn mesti hernaðarfræðingur landsins, trúmaður á guð og góðar byssur, talsmaður „frjálsrar samkeppni“, tryggur aðdáandi núverandi ríkisstjórnar og fyrrum menntamálaráðherra, Björn Bjarnason skrifar daglega pistla á heimasíðu sína, fulla af dulbúinni jákvæðni og földum fjörkippum. Hann kvaddi gamla árið með lofgrein um njósnir Morgunblaðsmanna af því sem fram fer innan Framsóknarflokksins og lýkur greininni á því að fara orðum um fjanda sinn, Ríkisútvarpið, og skrifar:

Björn Bjarnason

„Myndin sem helstu stuðningsmenn ríkisútvarpsins hafa dregið af framtíð stofnunarinnar er svo svört að líklegt er að þeir telji að þar dragi til stórtíðinda á árinu 2015 vegna fjárskorts. Hallgrímur Thorsteinsson, fráfarandi ritstjóri DV, hefur verið ómyrkur í máli um það sem hann gjarnan kallar aðför sjálfstæðismanna að ríkisútvarpinu. Nú er hins vegar skýrt frá því að hann ætli að huga að hljóðvarpsrekstri á vegum nýrra eigenda DV. Skyldi hann búa sig undir að fylla í skarðið eftir að ríkisútvarpinu verður lokað?

Til athugunar: … eftir að ríkisútvarpinu verður lokað …

Kannski er Björn forspár. Jafnvel djúpvitur. Það væri jákvætt. Hitt getur líka verið að þetta sé fullyrðing. Rétta eins og hann skrifar fullum stöfum. Og hann viti það vegna þess að hann sé enn að njósna, að ríkisstjórnin stefni að því að loka Útvarpinu á árinu. Það er neikvætt. Nema fyrir Bósana. Þeir blómstra í „jákvæðri“ leynd.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
2,287