Ritstjóri Herðubreiðar 03/04/2016

Forsætisráðherra uppvís að ítrekuðum ósannindum í Wintris-málinu

Í sérstökum Kastljósþætti Ríkisútvarpsins kom fram að Sigmundur Davíð Gunnlaugsson forsætisráðherra hefur ítrekað sagt ósatt í útskýringum sínum í hinu svokallaða Wintris-máli.Sigmundur – RÚV

Þar stendur einkum tvennt upp úr:

– Í viðtali við fréttamann sænska sjónvarpsins sagðist hann aldrei hafa haft nein tengsl við aflandsfélög, nema hugsanlega í gegnum fyrirtæki sem hann hefði unnið hjá. Því næst sagði hann að Wintris tengdist líklega öðru fyrirtæki, þar sem hann hefði setið í stjórn. Þetta var skömmu áður en hann gekk út úr viðtalinu og neitaði að svara fleiri spurningum. Hið rétta er að Wintris var frá upphafi í eigu forsætisráðherrahjónanna og tengdist ekki neinum öðrum félögum.

– Þau hjón hafa ítrekað sagt að það hafi verið mistök, að þau voru bæði skráð eigendur félagsins. Í gögnum sem Jóhannes Kr. Kristjánsson lagði fram í þættinum kom þó skýrt fram, að þau voru skráð hvort fyrir sínum helmingnum með fullri vitund og vilja beggja, og hvergi er minnst á mistök. Sigmundur Davíð seldi eiginkonu sinni hlut sinn á gamlársdag 2009 fyrir einn Bandaríkjadal, sólarhring áður en lög tóku gildi sem sett voru til höfuðs félögum í skattaskjólum. Forsætisráðherra reyndi í viðtalinu fyrst að þræta fyrir þetta, en gekk á dyr þegar honum var sýnd undirskrift hans í formlegum skjölum.

Flokkun : Efst á baugi
0,738