Forsætisráðherra segir ósatt um sms-styrki. Fylgdi ekki verklagi síðustu ríkisstjórnar

Það er ekki rétt, sem forsætisráðherra fullyrti í útvarpsfréttum í gær, að hann hafi fylgt verklagsreglum fyrri ríkisstjórnar þegar hann úthlutaði styrkjum í árslok 2013.

Ráðherrann sagði orðrétt í frétt Ríkisútvarpsins: „Þarna var hins vegar ákveðið fyrirkomulag sem að við tókum við frá síðustu ríkisstjórn.“ Þetta er ekki rétt, eins og Björn Valur Gíslason bendir á í grein og skrifar:

„Úthlutaði Jóhanna einhverntímann styrkjum til þeirra sem ekki báðu um þá?
Eru dæmi um að Jóhanna hafi sent fólki styrki með SMS skilaboðum?
Hvenær úthlutaði Jóhanna helmingi styrkja í sitt eigið kjördæmi?

Staðreyndin er sú að þetta er allt ósatt hjá forsætisráðherranum eins og fram kemur í skýrslu Ríkisendurskoðunar um dæmalausa meðferð ráðherrans á almannafé. Það eru engin dæmi um viðlíka vinnubrögð og hann hefur ástundað. Á síðasta kjörtímabili úthlutaði sérstök ráðherranefnd styrkjum í samráði við fagráðuneytin til ýmissa verkefna sem annað hvort voru ákveðin af Alþingi eða samkvæmt ákvörðun ríkisstjórnarinnar sjálfrar.

Forsætisráðherra virðist líta svo á að sannleikurinn sé sjaldgæf og takmörkuð auðlind sem beri að fara sparlega með.“