Ritstjóri Herðubreiðar 25/06/2015

Forsætisráðherra: „Furðulegt bull“ í Eiríki Bergmann. Hefur þó ekki lesið grein hans

Sigmundur Davíð Gunnlaugsson forsætisráðherra kallar nýlega fræðigrein Eiríks Bergmanns Einarssonar prófessors „furðulegt bull.“ Hann hefur þó ekki lesið greinina né hyggst hann gera það.sigmundur-david

Þetta kom fram í þættinum Þjóðbraut á sjónvarpsstöðinni Hringbraut í kvöld.

Stjórnandinn, Páll Magnússon, spurði forsætisráðherra út í greinina, þar sem Eiríkur rökstyður eftir viðteknum mælikvörðum að Framsóknarflokkurinn hafi breyst í þjóðernispópúlískan flokk eftir að Sigmundur Davíð komst þar til forystu.

„Þetta er furðulegt bull,“ svaraði forsætisráðherra og gerði því skóna að rannsókn Eiríks Bergmanns stæðist ekki fræðilegar kröfur. Hann hefði líka áður dregið alrangar ályktanir um Framsóknarflokkinn og stefnu hans.

Aðspurður hvort hann hefði lesið grein Eiríks sagði Sigmundur Davíð: „Ég ætla ekki að eyða tíma mínum í það.“

Grein Eiríks Bergmanns (á ensku) er að finna hér.

Flokkun : Efst á baugi
0,826