trusted online casino malaysia
Úlfar Þormóðsson 05/06/2016

Fórnarlambið

Framsóknarmenn héldu miðstjórnarfund í gær (04.06.´16). Hann var víst ánægjulegur og samtaða mikil. Formaður flokksins mætti endurnærður eftir nokkurra vikna frí. Hann hélt langa ræður, talaði um fjármál sín og upplýsti með skrauthvörfum að allt Panamaskjalamálið væri tilbúningur mannorðsmorðingja sem hugðust slátra honum til þess að koma höggi á flokkinn. Framsóknarflokkinn. Fyrir þessar einlægu upplýsingar uppskar hann langvarandi lófatak.

sigmundur davíðEins og menn mega muna hefur formaðurinn sagt að það væri sök bankamanna að hann eigi fé á leynireikningi á Tortólu; þeir plötuðu hann, sveitamanninn, til þess arna. Töldu honum líka trú um að það skipti máli að þetta færi leynt. Þess vegna sagði hann ekki einu sinni félögum sínum í In Defence hópnum frá því að eiginkonan (og þar með hann jafnframt) væri einn af „hrægömmunum“ sem gerðu kröfur Icesave-málinu. Af þeim sökum tókst honum að sitja beggja vegna samningaborðs um fjárheimtur gammanna; fyrir ráðherradóm og eftir að hann varð forsætis.

En miðstjórnarræðan var ekki um þetta. Vegna þessa var engin iðrun sýnd eða einlæg játning gerð. Grunnstefið í ræðunni var, eins og svo oft áður hjá flutningsmanni, að allt sem miður hafi farið í málum hans væri öðrum að kenna. Íslenskir og sænskir mannorðsmorðingjar ginntu hann, hreinlyndan manninn, á fölskum forsendum til þess að taka að sér hlutverk í fyrirfram sömdum leikþætti. Hann var leiksoppur. Fórnarlamb. Á því bað hann miðstjórnarmennina afsökunar, á því að hafa látið plata sig.

Ánægjulegur fundur, segja miðstjórnarmenn. Þeir eru hressir. Það er gott. Og eftir afhjúpun á eigin flónsku og afsökun á glópskunni ætlar foringinn að halda áfram í stjórnmálum; bjóða sig fram til þess að leiða þjóðina „um dimman dal“ svo vitnað sé í helgirit.  Hann vill vera þingmaður og ráðherraefni síns flokks. Og formaður. Við það er svo til engin andstaða  í miðstjórninni. Enda við hæfi að hann verði áfram formaður. Formaður Framsóknarflokksins.

Latest posts by Úlfar Þormóðsson (see all)
Flokkun : Efst á baugi
1,352