Formaður fjárlaganefndar fer með rangt mál og varpar sök á aðra

Allir sem hafa verið í leikskóla vita að það er bannað skrökva og reyna að kenna öðrum um.

Þetta er meðal þess sem Margrét Tryggvadóttir skrifar í grein í Herðubreið.

Tilefnið er þau ummæli Vigdísar Hauksdóttur, formanns fjárlaganefndar, að fyrri ríkisstjórn hafi hækkað laun túlka um helming og því tæmist túlkasjóður heyrnarlausra helmingi hraðar en áður. Hann er nú tómur, sem kunnugt er, og heyrnarlausir fá ekki nauðsynlega þjónustu.

Hið rétta er að gjaldskrá fyrir túlkaþjónustu hækkaði úr tæpum sjö þúsundum í tíu þúsund krónur. Það jafngildir ekki launahækkun hjá túlkum.

Þá bendir Margrét á að fjárveitingavaldið sé hjá alþingi og þar hafi Vigdís nú stýrt fjárlagagerð í tvö ár. Ábyrgðin sé því hennar og núverandi stjórnarflokka, ekki hinna fyrri.

„Við getum ekki haft manneskju eins og Vigdísi Hauksdóttur í jafnmikilvægu embætti og formaður fjárlaganefndar er. Hún ber ekki virðingu fyrir grundvallarmannréttindum, lýgur og reynir að koma eigin sök á pólitíska andstæðinga. Hún verður að víkja,“ segir Margrét í greininni sem lesa má hér.