Forgangsmál á 1sta maí

 

Það logar allt í verkföllum og fyrirliggjandi vinnustöðvunum um land allt. Verklýðurinn fer fram á 70 þúsund króna hækkun lægstu mánaðarlauna í áföngum á næstu þremur árum. Þeim eru boðnar 6 þúsund. Þetta þykja óhóflegar kröfur á sama tíma og forstjóri forstjóri KEA hefur þegar þegið 450 þúsund króna launahækkun á mánuði.

Það stefnir allt í stórastopp. Það vita allir. Meira að segja ráðherrar ríkisstjórnarinnar. Þeir hafa áhyggjur. Og leita lausna. Hafa fundið orsökina fyrir ókyrrðinni. Þeir hafa komist að því hvað er forgangsmál. Og af alkunnri hógværð og mannkærleik tilkynnti fjármálaráðherra verklýðnum þetta í dag, 1sta maí.

Framar öllu bera að gera þetta: Að fella niður sérstakan raforkuskatt á álverin í landinu, en stóriðjan nýt­ir ná­lægt 80% af fram­leiddri raf­orku hér­lend­is. Skatturinn gaf eittþúsund og sexhundruð miljónir í ríkissjóð á liðnu ári. Í þessari forgangsgjörð felast þau skilaboð til landsmanna að í ríkissjóði sé meira en nóg af fé.

Það er ekki heldur hlutverk ríkisstjórnarinnar að hjálpa til við að leysa úr kjaradeilum og koma í veg fyrir verkföll:

„Meginhlutverk stjórnvalda er að treysta betur rammann fyrir atvinnustarfsemina í landinu almennt, þar sem efnahagslegur og lagalegur stöðugleiki ríkir. Afnám raforkuskatts er forgangsmál sem fellur vel að þessari mynd,“ hefur Ríkisútvarpið eftir fjármálaráðherranum nú í hádegi, þann 1sta maí, hálftíma áður en verklýðurinn ætlar að safnast saman á Hlemmi og hefja kröfugöngu að baráttufundi í miðborginni. Þess væri óskandi að fundurinn léti stjórnvöld vita hvað hinn vinnandi maður telur vera forgangsmál og hreyfingar þeirra láti verkin tala í framhaldi af þeirri yfirlýsingu.