Ritstjóri Herðubreiðar 30/06/2015

Fólk með engar verðtryggðar skuldir fær tæpa sex milljarða úr ríkissjóði. Í reiðufé. Óþarfa neikvæðni, segja álitsgjafar

Fólk með engar verðtryggðar húsnæðisskuldir fékk 5,8 milljarða úr ríkissjóði með „skuldaleiðréttingu“ ríkisstjórnarinnar, óháð eignum og tekjum.Bjarni og Sigmundur

Þetta kemur fram í grein Þórðar Snæs Júlíussonar, ritstjóra Kjarnans, í gær. Formið á þessari tilteknu leiðréttingu er „sérstakur persónuafsláttur“, með öðrum orðum afsláttur af tekjuskatti, í stað lækkunar höfuðstóls húsnæðislána.

Ritstjórinn sækir upplýsingar sínar í skýrslu Bjarna Benediktssonar til Katrínar Jakobsdóttur um framkvæmd „leiðréttingar“ á húsnæðisskuldum landsmanna.

Þar kemur einnig fram að heimili sem eiga yfir hundrað milljónir skuldlaust hafi fengið hálfan annan milljarð úr ríkissjóði í formi skuldalækkunar. Svo og, að tekjuhæstu hóparnir hafa fengið mesta niðurfærslu skulda.

Sumir eru ósáttir við þessa ráðstöfun fjármuna, svo sem Björn Valur Gíslason varaformaður Vinstri grænna, sem skrifar í Herðubreið:

„Hægriflokkarnir færðu skatttekjur úr ríkissjóði frá tekjulægsta hópi skattgreiðenda til tekjuhæsta hóps skuldara.“

Aðrir eru jákvæðari, svo sem ritstjóri Herðubreiðar, sem telur ærið tilefni til að fagna:

„Nú loks eftir markvissar aðgerðir hægri stjórnarinnar hefur aðþrengd millistéttin efni á því sem sárast var að geta ekki veitt sér. Nú þarf hún ekki lengur að lita á sér hárið sjálf.

Til hamingju, við öll.

Einkum þó… – ég ætlaði að skrifa krabbameinssjúklingar, hjúkrunarfræðingar og annað minni háttar fólk.

En það er of mikið af neikvæðni í samfélaginu.

Nú er tími til að gleðjast.“

 

 

Flokkun : Efst á baugi
0,899