Úlfar Þormóðsson 01/06/2015

Firring

Hvað eftir annað óskapast formaður Sjálfstæðisflokksins og fjármálaráðherra yfir því að verkalýðsfélög leggi áherslu á mismunandi atriði við gerð kjarasamninga. Hann segir að það sé ekki hægt að semja við slíkar aðstæður. Það sé ómöguleiki. Hann spyr, hann þráspyr, hvernig þetta megi vera.

Bjarni Ben

Þetta er merkilegt. Eða ómerkilegt. Eða hefur maðurinn ekki hugmyndaflug eða getu til þess að átta sig á því að þarfir skúringafólksins, sem forsætisráðherra rak frá störfum í ráðuneytinu, geti verið aðrar en rafvirkja og pípara. Að þarfir fiskverkafólks séu aðrar en skrifstofufólks hjá Borgun ehf, sf, há eff eða hvernig þeir frændur skrá fyrirtækið til þess að þeir beri sem minnsta persónulega ábyrgð ef illa fer. Að það væri eðlilegur ómöguleiki að svínahirðir setji fram sömu kröfur varðandi sitt starf og sína vinnu og geislatæknifræðingur á Landspítalanum eða verkstjóri hjá N1, eða Enn einum.

Hefur fjármálaráðherra landsins aldrei verið innan um fólk sem vinnur almenn störf og breytileg? Hefur hann aldrei hitt neinn sem er í verkalýðsfélagi, aldrei talað við slíkan, aldrei hlustað á verklýðinn á vinnustað? Dvelur maðurinn í ómöguleikanum, eða í hvaða veröld býr hann?

Úlfar Þormóðsson
Latest posts by Úlfar Þormóðsson (see all)
Flokkun : Pistlar
1,064