Úlfar Þormóðsson 09/06/2015

Fallin spýtan

Nú leikur allt í lyndi hjá stjórnarherrunum. Það er ofboðfé í augsýn og þögulir menn og skömmustulegir lyfta brúnum og viðurkenna loks að þeir hafi kosið Framsókn. Það er gott að gleðjast. Einn dag í senn.

IMG_4283

Fyrir rúmu ári, í byrjun maí 2014, var skattrannsóknarstjóra boðin til kaups listi með nöfnum mörg hundruð íslenskra fyrirtækja og einstaklinga sem eiga/áttu falið fé í skattaskjólum. Skattstjórinn bað um aðstoð fjármálaráðherra sem svaraði beiðninni í Útgerðar-Mogganum 2. Maí 2014:  „Ekkert er vitað hvað er í slíkum gögnum og það er ekki gott fordæmi að menn geti gert sér það að féþúfu að selja gögn sem jafnvel er komist yfir með ólögmætum hætti og hefur verið aflað fyrir skattfé í öðrum ríkjum.“ Mogginn bætti svo við frá eigin útgerð: … „ljóst er að kaup á slíkum gögnum gæti í kjölfarið torveldað samskipti Íslands við þau ríki sem eiga að halda utan um slíkar upplýsingar.“

Nú, rúmu ári síðar, eru gögnin loks komin í hendur skattrannsóknarstjóra. „Næsta skref er að greina þessi gögn … Það verður farið af stað í þetta eins fljótt og hægt er. Síðan er algjörlega óljóst hvernig verður unnið úr einstökum málum. Sum taka langan tíma en önnur styttri, eins og gengur,“ er haft eftir Bryndís Kristjánsdóttur, skattrannsóknarstjóra á Dv.is.

Eins fljótt eins og kostur er. Þetta er eftirtektarverð yfirlýsing, en ástæðan fyrir henni er ljós. Því lengri tíma sem það tekur að vinna úr gögnunum þeim mun meiri möguleika hafa skattaþjófarnir á að eyða skjölum erlendis, færa til fé og koma því annað

Vegna ákvörðunarfælni ríkisstjórnarinnar hafa þjófarnir þegar fengið fjórtán mánuði til þess að skipa sínum málum. Á þeim tíma hafa einhver brot fyrnst. Auk þess notaði ríkisstjórnin tímann hér heima til þess að skera niður fárveitingar til „eftirlitsiðnaðarins“ eins og gleiðustu frjálshyggjumenn kalla opinbert eftirlit. Meðal stofnana sem lentu undir niðurskurðarhnífnum var embætti skattrannsóknarstjóra. Þjófarnir eiga því enn von, því að þetta þarf að vinna vel og það tekur tíma. Þá fyrnast mál og nýjar flóttaleiðir opnast.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,762