Er Árni Páll á móti trúfrelsi? Stuðningur við þjóðkirkju samrýmist ekki jafnaðarstefnu

Fólki er mismunað eftir trúarbrögðum og lífsskoðunum á meðan starfrækt er sérstök þjóðkirkja sem fær sérstakan fjárhagslegan stuðning frá hinu opinbera og nýtur verndar umfram aðra í stjórnarskrá. Jafnaðarmenn geta ómögulega varið slíka mismunun.

Þetta segir Sigurður Hólm Gunnarsson í opnu bréfi til Árna Páls Árnasonar, formanns Samfylkingarinnar. Tilefnið eru ummæli árna Páls í sjónvarpsþætti í gær, að hann sé mikill stuðningsmaður þjóðkirkjunnar og telji hana eiga að hafa sérstaka lagalega stöðu í samfélaginu.

Sigurður skrifar meðal annars:

„Þessi yfirlýsing þín hryggir mig því ég tel að ríkiskirkja og öll mismunun vegna trúar- eða lífsskoðana geti ómögulega samræmst jafnaðarstefnunni. Stefnu sem mér þykir mjög vænt um.

Ég veit að þú ert trúaður og ert sjálfur í Þjóðkirkjunni. Trú þína virði ég að sjálfsögðu auk þess sem ég skil ágætlega að þér þyki vænt um þína kirkju.

Það sem ég get ómögulega skilið er að þú teljir að það sé í lagi að hið opinbera mismuni fólki þegar kemur að trúarbrögðum. […]

Mismunun er mismunun og frjálslyndir jafnaðarmenn eiga að berjast gegn mismunun á öllum sviðum. […]

Stuðningur minn, og margra annarra frjálslyndra jafnaðarmanna, við Samfylkinguna getur verið í hættu ef formaðurinn er beinlínis á móti fullu trúfrelsi á Íslandi. Það þykir mér leitt enda stendur jafnaðarhugsjónin mér nærri og ég hef hingað til talið að Samfylkingin hafi mikilvægu hlutverki að gegna í íslenskum stjórnmálum.

Ýmsir talsmenn Þjóðkirkjunnar hafa beinlínis talað gegn lífsskoðunum annarra Íslendinga og það á (óvenju háum) launum frá hinu opinbera. Þjónar Þjóðkirkjunnar hafa reglulega komið fram í fjölmiðlum til að benda á að trúleysingjar séu siðlausir, að þeir ógni mannlegu samfélagi auk þess sem þeir eru jafnvel bornir saman við ógnarstjórnir kommúnismans og nasismans. Slíkur málflutningur er ekki viðeigandi frá kirkju sem kennir sig þjóðina. […]

Afstaða Þjóðkirkjunnar til hinsegin fólks er því miður ekki til fyrirmyndar heldur. Þjóðkirkjupresta ráða því sjálfir hvort þeir gefa saman fólk af sama kyni, sem þó má gifta sig samkvæmt lögum. Þar að auki tekur hin stjórnarskrárverndað Þjóðkirkja þátt í samstarfi við ýmsar hreyfingar, innlendar sem erlendar, sem breiða reglulega út hatursboðskap gagnvart samkynhneigðum. […]

Þar sem jafnaðarmenn berjast venjulega fyrir almannahagsmunum en gegn sérhagsmunum finnst mér eindreginn stuðningur formanns jafnaðarmannaflokks við Þjóðkirkju skjóta skökku við.“