Enn harðna átökin um húsnæðismál: Stríð gegn Eyglóu? Aftaka?

Fjármálaráðuneytið hefur greinilega lagt kostnaðarmat, og líka pólítískt mat, á annað tveggja húsnæðisfrumvarpa Eyglóar Harðardóttur húsnæðismálaráðherra. Niðurstaðan er neikvæð.

Þetta kom fram í fréttum Ríkisútvarpsins í gærkvöldi, en fréttastofa þess hefur undir höndum umsögn ráðuneytisins um frumvarp Eyglóar um húsnæðisbætur, sem snýst um að jafna rétt fólks, óháð því hvort það leigir eða kaupir húsnæði.

Hitt frumvarp húsnæðisráðherrans fjallar um stofnstyrki til byggingar leiguíbúða að norrænni fyrirmynd. Það er ekki fullbúið og er það sem bíður kostnaðarmats í fjármálaráðuneytinu.

Um hið fyrra og að því er virðist fullbúna frumvarp – um jafnan rétt leigjenda og kaupenda – er fjármálaráðuneytið hins vegar afdráttarlaust í umsögn sinni: Það er á móti málinu. Telur það ganga gegn markmiðum sínum og jafnvel þjóna hagsmunum leigusala.

Pennar Herðubreiðar hafa að vanda sína sýn hver um málsatvik og vöxtu. Jón Daníelsson telur Bjarna Benediktsson vera kominn í stríð við Eyglóu – ekki síst með markvissum leka á ofangreindri umsögn ráðuneytisins.

Björn Valur Gíslason segir umsögn fjármálaráðuneytis Bjarna jafngilda tilraun til pólitískrar aftöku á Eyglóu Harðardóttur.

Hvað sem því líður ríkir enn neyðarástand á húsnæðismarkaði, bæði til leigu og sölu, að sögn allra sem til þekkja.