Ritstjóri Herðubreiðar 06/10/2015

Enn eiga huldumenn tugmilljarða á Tortóla. Enn fá útvaldir að græða og hinir ríkustu hagnast mest

Viðskiptabankarnir, sem voru endurreistir og starfa í skjóli almannavaldsins, handvelja þá sem fá að eignast verðmæti á Íslandi á gjafverði. Um leið fá reikningshafar á aflandseyjum afslátt hjá Seðlabankanum.Peningar, auðmenn

Þetta er meðal þess sem kemur fram í yfirgripsmiklum leiðara Þórðar Snæs Júlíussonar ritstjóra í Kjarnanum.

Þar lýsir Þórður Snær því hvernig bankarnir handvelja fólk, sem nýtur aðstöðumunar vegna einkaviðskipta eða prívatþekkingar á einstökum fyrirtækjum, til að kaupa hlut í þeim áður en öðrum er gefinn kostur á því við endurskipulagningu slíkra félaga.

Ritstjórinn lýsir til dæmis viðskiptum með hluti í Högum, Borgun og Skeljungi, þar sem stjórnarformaður Fjármálaeftirlitsins til skamms tíma átti hlut að máli. Í öllum tilvikum högnuðust viðkomandi um hundruð milljóna eða milljarða.

Hann minnir á, að hið sama sé að gerast þessar vikurnar með Símann, þar sem Arion banki seldi „áhugasömum“ hlut sinn nokkrum vikum áður en félagið verður skráð á markað nú um miðjan mánuðinn. Verðmæti þess hlutar hefur nú þegar hækkað um hátt í 30 prósent.

Auk þessa vitnar ritstjóri Kjarnans í tölur Seðlabankans um eignir Íslendinga á Tortóla, en þær hafa fjórfaldast á átta árum, sem að hluta til skrifast á gengisfall íslensku krónunnar, en þó einkum hafi peningum verið komið undan.

Eigendur þessa fjár hafa svo getað fært peninga sína hingað til lands í gegnum fjárfestingarleið Seðlabankans – með sérstökum afslætti á gengi íslensku krónunnar – og þar með haldið áfram að hagnast á brunarústunum sem margir hverjir skildu væntanlega eftir sig í Hruninu.

Þetta er „allt sama gamla liðið sem er að gera alla dílana,“ hefur Þórður Snær eftir heimildum sínum í fjármálaheiminum.

Seðlabankinn hefur ítrekað neitað að gefa upp hverjir þeir eru, sem hafa nýtt sér þessa sérstöku fjárfestingarleið.

Leiðari Þórðar Snæs er í heild sinni er hér.

Flokkun : Efst á baugi
0,840