Úlfar Þormóðsson 06/01/2016

Embættismaður með köllun

Það heyrir til undantekninga að embættismenn taki landa sína á beinið. Hvað þá að þeir hafi burði til þess. En landlæknir hefur merg í beinum og tilkynnti okkur það í Útvarpinu í gær (05.01.´16) að heilbrigðiskerfið hefði verið rekið á rangan hátt síðustu tvo áratugina, peningarnir sem í það fara séu ekki nýttir sem skyldi og fyrir vikið hafi Landsspítalinn ekki forsendur til þess að gegna hlutverki sínu.

image

Um árabil hefur Landsspítalinn ekki getað komið sér upp nægilega góðri aðstöðu til þess að vinna á öllum þeim kvillum sem manninn hrjá. Af þessum sökum hafa sprottið upp einkaklíníkur sem sumar hverjar eru betur búnar tækjum en Landsspítalinn og á þeim vinna margir af færustu læknum spítalans gott starf.

Þegar rætt er um Landsspítalann gleymast stundum að hann er háskólasjúkrahús og hefur skyldur sem slíkur. Mörgum sem vel til þekkja þykir það ekki samrýmast kröfum sem gera má til háskólasjúkrahúss að hafa þar starfandi sérfræðinga sem eru með einkareknar stofur úti í bæ. Landlæknir sagði þetta ekki samræmast þeim kröfum sem gerðar séu til háskólasjúkrahúss og bendir á hið augljósa að það hljóti að vera erfiðara að skipuleggja þjónustu á spítala þar sem sérfræðingar séu ekki aðgengilegir allan tíman. Það geti haft alvarlegar afleiðingar í för með sér ef ekki eru menn með rétta hæfni á réttum stað, á réttum tíma.

Það er vandalaust að taka undir með landlækni þegar hann segir að setja eigi heilsugæsluna, þjónustuna úti á landi og málefni háskólasjúkrahússins í forgang. Hins vegar er vandinn meiri að átta sig á upp á hvern á að snúa erindinu. Heilbrigðisráðherrann sefur, fjármálaráðherra er talsmaður einkareksturs og forsætisráðherrann er svo heillum horfinn á nýju ári að það fyrsta sem hann lætur frá sér fara á því er „að verðtryggð íslensk króna sé sterkasti og stöðugasti gjaldmiðill í heimi.“

Landlæknir er embættismaður með köllun. Hann hefur þekkingu á þeim málum sem hann fjallar um. Og þar sem ráðandi öfl virðast ekki hafa burði til þeirra verka sem vinna þarf verður hann að reka erindið um bætta læknisþjónustu sjálfur með stuðningi okkar hinna sem viljum efla heilbrigðisþjónustuna. Ef til vill ætti hann að snúa sér beint til velferðarnefndar alþingis.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,738