Ekki við

Eftir Jakobínu Sigurðardóttur

Veiztu hverjir hylla þig,

varaforseti?

Ekki hann faðir minn,

ekki hún móðir mín,

ekki hann bróðir minn,

ekki hún systir mín,

ekki hann sonur minn,

ekki hún dóttir mín,

og ekki ég.

 

Því við eigum Reykjanes,

varaforseti,

við eigum Heiðarfjall,

Hvalfjörð og Aðalvík.

Við eigum hnjúkana,

vötnin og heiðarnar,

víkurnar, dalina,

miðin og strendurnar.

 

Veiztu hverjir blekkja þig,

varaforseti?

Ekki hann faðir minn,

ekki hún móðir mín,

ekki hann bróðir minn,

ekki hún systir mín,

ekki hann sonur minn,

ekki hún dóttir mín,

og ekki ég.

 

Veiztu hver er íslenzk þjóð,

varaforseti?

Ekki þeir sem hylla þig,

ekki þeir sem blekkja þig.

Þeir trúa á böðulinn,

þeir trúa á peninginn.

Ekki spara þeir eiðana

öfugmælasmiðir.

 

Þú ert ekki velkominn,

varaforseti,

því við erum íslenzk þjóð,

varaforseti,

þjóðin er hann faðir minn,

þjóðin er hún móðir mín,

þjóðin er hann bróðir minn,

þjóðin er hún systir mín,

þjóðin er hann sonur minn,

þjóðin er hún dóttir mín,

þjóðin er ég.

 

Varaðu þig á vinum þínum,

varaforseti.

Þeir sviku föður minn,

þeir sviku móður mína,

þeir sviku bróður minn,

þeir sviku systur mína,

þeir sviku son minn,

þeir sviku dóttur mína,

þeir sviku mig.

 

En við svíkjum engan,

varaforseti.

Daginn, sem landar þínir

draga til hafs

morðtólamenninguna,

markleysiseiðana,

og óvirðan er þvegin

af andliti lands míns,

þanni dag ert þú velkominn,

varaforseti,

og óskipt mun heilsa þér

íslenzka gestrisnin.

Þá veiztu hverjir hylltu þig,

þá veiztu hverjir blekktu þig,

þá veiztu hver er íslenzk þjóð,

varaforseti.

 

Jakobína Sigurðardóttir (1918-1994)

(Mynd: Jakobína með lífsförunauti sínum, Starra í Garði, 1949. Eigandi: Sigríður Kristín Þorgrímsdóttir.)