Úlfar Þormóðsson 10/06/2015

Eitthvað er það

Framsóknarmenn eru ennþá glaðir. Líklega þriðja daginn í röð. Það stafar meðal annars af því að þeir hafa talið sér trú um að Sigmundur Davíð hafi fyrstur allra manna áttað sig á því að hægt væri að ná pening úr föllnu bönkunum og hvernig ætti að standa að því. Hann hafi bjargað málum. En þannig er það ekki. Í hvorugu tilvikinu.

Bjarni-Sigmundur

Fjölda margir ræddu þá aðferð sem valin var gegn þrotabúunum. Þeir vissu allir að það skipti máli að fara lágt með það. Bundust trúnaði vegna þess hve málið var viðkvæmt. Það var síðan Sigmundur Davíð sem rauf trúnaðinn og byrjaði að tala af offorsi. Meðal annars um gulrót og kylfu. Löngu áður en það var tímabært.

Það var heldur ekki Sigmundur Davíð sem lét útfæra hugmyndina. Það var Bjarni Benediktsson. Verkið unnu starfsmenn fjármálaráðuneytis, Seðlabanka og nokkrir utanaðkomandi. Við þá vinnu þvældist Sigmundur Davíð fyrir og tafði framgang málsins í meira en ár með óraunhæfum hugmyndum. Og hann rauf líka trúnað í þessu atriði málsins. Trúnað við fjármálaráðherrann. Gerði það á landsfundi Framsóknarflokksins með blaðri sínu um stöðugleikaskatt.

Bjarni og Sigmundur

Eðlilega pirrar það Sjálfstæðisflokkinn og formann hans að Sigmundur Davíð skuli vera að stela senunni í þessu máli. Ræna heiðrinum af vinnunni sem var allt í senn mikil, flókin og erfið. Og í sigurgleðinni hleypa frammararnir af fallbyssuskotum: Þeir segjast ætla að halda Landsbankanum í ríkiseign. Það gengur þvert á yfirlýsta stefnu fjármálaráðherra og Flokksins.

Innstu koppar í Sjálfstæðisflokknum eru fyrir löngu búnir að fá upp í kok af samstarfinu við Framsókn. Ef ég væri ekki vondur spámaður, eins og ég hef margsinnis sýnt af mér, mundi ég spá því að sjálfstæðismenn væru að undirbúa kosningar. Ég er að vísu búinn að segja það áður. En þrátt fyrir að það hafi ekki orðið enn endurtek ég spána og spyr af þessu tilefni:

bjarni-sigmundur

Hvernig stendur á því að Útgerðarmogginn er borin ókeypis í hús í tvígang á einni viku? Fyrst með skálduðum árásum á Steingrím J., sem andlegur trekantur Flokksins hefur síðan haldið uppi út um allar holtagrundir, og aftur nú í dag með fjögurra dálka fyrirsögn um skattalækkun í boði Flokksins með afnámi vörutolla.

Guð varðveiti mig ef ég hef rétt fyrir mér en fyrirgefi mínar skuldir ef ég hef dregið rangar ályktanir.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,747