trusted online casino malaysia
Úlfar Þormóðsson 27/09/2015

Drýldni

Við erum orðin vön því hér innanlands að forsætisráðherrann grobbi úr hófi þegar hann tekur til máls og segi ósatt þegar hann sperrir sig. Ferskustu dæmin um það voru úr stefnuræða hans við þingsetningu nú í mánuðinum. Þar til í gær. Þá varð til nýtt dæmi þegar ráðherrann fékk drýgindakast á þingi Sameinuðu þjóðanna.

sigmundur davíð

Orð hans flug vítt um geim þegar hann sagði fyrir framan heiminn allan að Ísland hefði „ný­lega heitið því að draga úr los­un gróður­húsaloft­teg­unda um 40% fyr­ir árið 2030“. Yfirlýsing hans vakti ánægju; álitið var að hann hefði sagt satt orð. Formaður Nátt­úru­vernd­ar­sam­taka Íslands sagði að orð ráðherrans væru af­drátt­ar­laus­ari um skuld­bind­ing­ar Íslands í lofts­lags­mál­um en áður. „Við höf­um sagt að við mun­um taka við svo­kölluðu „sann­gjörnu hlut­falli“ þangað til núna, þegar for­sæt­is­ráðherra seg­ir að við mun­um draga úr los­un um 40%, ná­ist samn­ing­ar.“

Svo rann upp næsti dagur, nýr og fagur. Fram á sviðið gekk aðstoðarmaður ráðherrans til þess að túlka og leiðrétta orð yfirboðara síns. Hann sagði að ræða hans marki ekki stefnu­breyt­ingu í lofts­lags­mál­um af Íslands hálfu. „Þetta er ekki ein­hliða yf­ir­lýs­ing um 40% lækk­un af Íslands hálfu held­ur mark­mið um 40% lækk­un í sam­floti með Evr­ópu­sam­band­inu,“ sagði hann í viðtali við Mbl.is. og bætti því við að stjórn­völd á Íslandi hygg­ist enn taka við „sann­gjörnu hlut­falli“ af heild­arminnk­un los­un­ar gróður­húsaloft­teg­unda á Evr­ópu­sam­bands­svæðinu en hafi ekki skuld­bundið sig til þess að draga úr los­un um 40%.

Um framgöngu ráðherrans skrifar Jónas Kristjánsson á síðu sína, Jónas.is undir fyrirsögninni Lýgur að umheiminum:

„Sigmundur Davíð og ríkisstjórn hans stefna að smíði tveggja stærstu kísilvera í heimi. Alls munu þau losa nærri milljón tonn af kolefni út í andrúmsloftið. Það er fimmtungs viðbót við núverandi 4,5 milljón tonn. Samt taldi forsætis sér kleift að stíga í gær á stokk á vettvangi Sameinuðu þjóðanna. Lofaði 40% minni losun kolefnis. Sigmundur Davíð er ekki feimnari við að ljúga að umheiminum en að Íslendingum. Ekkert, sem hann segir, er í sambandi við veruleikann. Málar bara upp þann sýndarveruleika, sem hann telur henta aðstæðum hverju sinni. Þannig komst hann til valda og þannig hyggst hann halda völdum. Með nýrri lygi.“

Og ein „gróður­húsaloft­teg­unda“- frétt birtist rétt í þessu á Eyjunni.is. „Það er eitthvað ótrúlega brenglað við þá hugmynd að ætla að koma fyrir 16 eldsneytisdælum í hverfi sem hefur hlotið alþjóðlega viðurkenningu sem umhverfisvæn byggð í hæsta gæðaflokki.“ Þetta skrifar Guðmundur Kristján Jónsson, borgarsmiður, á heimasíðu sína um þær fyrirætlanir bandarísku keðjunnar Costco að setja upp 16 bensíndælur utan við fyrirhugaða risaverslun í Kauptúni í Garðabæ.“ Þá bendir Guðmundur „á að á svæðinu sé vatns­ból Gjáa­rétt­ar, Vatns­gjá, auk þess sem Víf­ilsstaðahraunið norðan Urriðaholts er friðlýst. Þá njóti Urriðavatnið hverfisverndar í aðalskipulagi Garðabæjar og í yfirstandandi vinnu við nýtt aðalskipulag sé lögð mikil áhersla á umhverfismál og sjálfbæra þróun.“

Að slíkur gjörningur sem þarna er greint frá skuli vera í uppsiglingu sýnir hve illa ráðherrann er tengdur því sem hann er að tala um hverju sinni og óvíst hvort sífelld skreytni hans stafar af ofurdrýldni eða vanþekkingu nema hvort tveggja sé.

Latest posts by Úlfar Þormóðsson (see all)
Flokkun : Efst á baugi
1,426