Úlfar Þormóðsson 17/02/2016

Dellumakarar

Oft virðist sem dellumakarar komi að peningamálum fremur en fólk með heilli há. Af því leiðir marga vitleysu. Við höfum orðið fyrir þessu, Íslendingar, ekki síður en aðrar þjóðir. Til að axarsköftin falli ekki í gleymsku skulu hér nefnd þrjú; aðeins þrjú af ótal mörgum.

(Eigandi myndar: Sigurður Sigmundsson)

(Eigandi myndar: Sigurður Sigmundsson)

Í gerð Landeyjarhafnar hefur verið ausið miljörðum króna. Það er löngu vitað – kannski frá upphafi vega –  að þarna verður höfn aldrei til friðs. Í stað þess að hætta við verkið er enn verið að dæla peningum í það og áætlanir uppi um að auka í. Á meðan molnar úr höfnum víða um land því að þær fá ekki fé til viðhalds.

Miljarðatugum hefur verið og verður varið í ævintýralega stækkun Flugstöðvar Leifs Eiríkssonar. Vegna fjölgunar ferðamanna, segja talsmenn hinna örfáu einstaklinga sem ákvörðun taka um fjárausturinn. Sá sem um flugstöðina fer sér, að þar er verið að bruðla með almannafé með margskonar fínheitum og fokdýrum tæknibrellum, Innan áratugar gæti þjóðin setið uppi með allt of stóra flugstöð á Miðnesheiði og óbrúklega flugvelli um landið þvert og endilangt vegna þess að framkvæmdafé til viðhalds flugvalla fer um hendur dellumakara.

Eignaumsýslufélag, áður Straumur Burðarás fjárfestingarbanki, hefur greitt 20-30 núverandi og fyrrverandi starfsmönnum samanlagt 3,3 milljarða króna kaupauka. Stærstur hluti bónusgreiðslnanna mun renna til lykilstjórnenda sem hver um sig hefur fengið greitt jafnvirði hundraða milljóna króna, segir í fárra daga gamalli DV-frétt. Upphæðin sem þeir fá, stjórarnir, er til orðin vegna klúðursamnings sem dellumakarar ríkisstjórnarinnar gerðu við umsýslufélagið svo segja má að starfsmenn þess hafi auðgast á því að plata ríkið við samningaborðið.

Og höfum þetta til samanburðar:

Á næstu þremur árum er gert ráð fyrir að greiddar verði um 160 milljónir króna í sanngirnisbætur til fólks sem sætti illri meðferð á stofnunum, heimilum og skólum á vegum hins opinbera á síðustu öld. Bætur fyrir skemmd á lífi. Um er að ræða fjölda manns og gæti hver og einn gert sér von um að fá jafnvel meira en hundrað þúsund krónur í sinn hlut.

Og úti er alltaf að snjóa.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,925