Úlfar Þormóðsson 22/06/2015

Dauðinn kemur í heimsókn

Snorri Magnússon, formaður Landssambands lögreglumanna er mikill byssutrúarmaður. Hann heldur að byssur skapi röð og reglu. Og frið. Samkvæmt Útvegs-Mogganum hitti hann framkvæmdastjóra og sölumann byssuframleiðslufyrirtækis á dögunum. Það fór vel á með þeim, löggunni og sölumanninum. Þeir ræddu um rafstuðtæki eða rafbyssur, eiginleika gripsins og stöðu mála hér á landi. Blaðið hefur eftir Snorra:

Logregluverktaki2014

„Okkur þykir stórt stökk á milli þess að nota kylfur og piparúða annars vegar og svo yfir í skotvopn sem er næsta úrræði. Því teljum við mikilvægt í valdbeitingarstiganum að fá tæki sem getur valdið mun minni líkamlegum skaða á einstaklingum,“

„Rafbyssur geta sent rafbylgjur í skotmark í allt að 10 metra fjarlægð,“ segir blaðið og áfram: „Rafbylgjurnar trufla tauga- og vöðvastarfsemi þess sem verður fyrir þeim, þannig að viðkomandi fellur varnarlaus til jarðar og engist þar um í nokkrar sekúndur.“

Vilhjálmur Árnason, þingmaður Sjálfstæðisflokks, er áhugamaður um aukna áfengisdrykkju og byssuleiki; fyrsta ræða hans á þingi snéri einmitt að nauðsyn þess að lögreglan fengi rafbyssur. Hann hitti sölumanninn líka. „Ég er að vinna að þessu máli innan stjórnkerfisins. Rökin fyrir upptöku eru þríþætt. Að auka öryggi lögreglumanna og þeirra sem þarf að hafa afskipti af. Í annan stað að lækka sjúkra- og veikindakostnað hjá Sjúkratryggingum. Í þriðja lagi er þetta mikilvægt tæki til að auka möguleika kvenna í starfi til þess að beita valdi,“ segir Vilhjálmur við Útvegs-Moggann í dag, 22. júní.

Vilhjálmur Árnason

Það er sorglegt að hugsa til þess að áhrifamenn eins og þessir tveir tilvitnuðu einstaklingar eru skulu ekki gera sér grein fyrir því að vopn kalla á vopn; rafbyssur í höndum lögreglu hvetja lögbrjóta til þess að fá sér slíkar og ekki veikari. Þeir ættu að vita þetta. Þetta veit sölumaðurinn því að þessi löngu þekktu viðbrögð undirheimanna auka söluna og hagnað fyrirtækisins. Hann hefur hins vegar ekki sagt þeim frá því. Hann er að selja vöruna.

Byssuglöðu Íslendingarnir mættu líka velta því fyrir sér hvers vegna Ísland, með svo til óvopnaðri lögreglu, er talið friðsælasta land í heimi samkvæmt alþjóðamælingu sem sagt var frá á dögunum. Þeir mættu líka velta því fyrir sér hvers vegna það átti sér stað, sömu daga og þeir ræddu við sölumanninn, að Bandaríkjamenn fóru að leita leiða til þess að koma sér undan afleiðingum vopnavæðingar lögreglu og almennings þar vestra.

Byssuglöðu Íslendingarnir ættu að lesa meira sagnfræði til þess að koma auga á samhengi hlutanna fremur en að eyða tíma sínum með sölumönnum dauðans. Nema þeir vilji frekar stríð en frið sem ég efast um að sé vilji þeirra sem greiða þeim launin.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,789