Úlfar Þormóðsson 02/12/2015

Burt með manninn

Fjárlaganefnd alþingis er fyrst og fremst vinnunefnd. Hún er einnig eins konar stuðpúði fyrir hugmyndir ráðherra, góðar eða vondar. Það er hins vegar misskilningur að formaður- og varaformaður hennar séu þvílíkir valdamenn sem af er látið. Þeir eru málpípa ráðherra. Þegar þeir hafa uppi niðrandi háðungarorð um Landsspítalann eru þeir að tala fyrir munn Kristjáns Þórs Júlíussonar, heilbrigðisráðherra sem sefur af sér allar tillögur og ábendingar þeirra sem vilja halda uppi traustri og öflugri heilbrigðisþjónustu í landinu.

Kristján konungur fimmti

Heilbrigðisráðherra var vakinn til þess að fara í viðtal við Ríkisútvarpið vegna sjúkrahúsmála á Akureyri. Viðtal við hann var flutt í hádegisfréttum (02.12.´15). Þar sagði að ekki sé „gert ráð fyrir neinum fjármunum til viðbyggingar Sjúkrahússins á Akureyri á næstunni. Heilbrigðisráðherra segir verkefnið brýnt … en vinnuhópur skipaður af heilbrigðisráðherra taldi að nýbygging væri eini raunhæfi kosturinn til að leysa vandann sem við blasir í húsnæðismálum sjúkrahússins.“

Þá greindi útvarpið frá því að sjúkrahúsið hafi verið rekið með 70 milljóna króna halla fyrstu níu mánuði þessa árs og til þess að halda óbreyttum rekstri þurfi 110 milljóna króna framlag til viðbótar því sem gert er ráð fyrir á fjárlögum. Þessar óskir segir Kristján nú til meðferðar hjá fjárlaganefnd. Síðan bætti hann við, líkt og hann talaði upp úr svefni: „Við höfum heyrt það frá forstjóra og stjórnendum Sjúkrahússins að það vanti nokkra fjármuni inn í reksturinn.“

Það er kominn tími til að þingmenn hætta að elta ólar við vanvirðingarorð sem velta upp úr málpípum ráðherrans í fjárlaganefnd alþingis. Það er komið að því að þeir þingmenn sem vilja heilbrigðiskerfinu vel taki á svefngenglinum, lýsi vantrausti á hann, og láti greiða atkvæði um að víkja honum úr embætti.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,966