Brim leigir rússneskan kvóta á markaðsvirði og græðir metfé. Vill ekki greiða markaðsverð fyrir íslenskan kvóta

Einn af togurum útgerðarfélagsins Brims kom til hafnar í gær með einhvern verðmætasta heildarafla sem landað hefur verið, um 730 milljónir króna eftir 40 daga túr. 

Þetta kom fram í fréttum Ríkisútvarpsins í dag.

Athygli vekur að fiskurinn – þorskur að uppistöðu til – var veiddur í rússneskri lögsögu og hægt var að veiða hann vegna þess að fyrirtækið leigði kvóta af Rússum. Sigling á miðin er bæði löng og dýr, en stendur greinilega undir sér. Áætlaður hásetahlutur eftir túrinn er um 7,3 milljónir króna.

Forsvarsmenn Brims, líkt og annarra útgerðarfyrirtækja, hafa lýst andstöðu við hugmyndir um að kvóti á Íslandsmiðum verði leigður út á markaðsverði. Slíkt fyrirkomulag myndi setja vel flest útgerðarfyrirtæki á höfuðið og valda margs konar öðrum vanda. (Mynd: ruv.is)