Úlfar Þormóðsson 17/08/2016

Bravó!

Litli-Jón ætti svo sannarlega að gleðjast þessa dagana. Hann er með 339 þúsund krónur í laun á mánuði og á von á 3% kauphækkun undir verturnætur. Gleðina getur hann alfarið þakkað ríkisstjórninni sem hugsar stöðugt um litla manninn og hefur nú losað um höftin sem hafa haldið aftur af honum; gjaldeyrishöftin. Déskotans höftin, sem hafa íþyngt honum í fjöldamörg ár.

Ríkisstjórn B og D

Útvarpið fullyrðir að „almenningur fái að fjárfesta fyrir 100 milljónir króna í útlöndum á ári“. Hugsa sér; hundrað miljónir á ári. Þetta er einmitt það sem Litli-Jón þarf til þess að geta lifað sómasamlegu lífi; að geta átölulaust flutt 100 miljónir af sparifénu sínu til útlanda; já, hvert sem er um lönd og eyjar.

Og hér er þó aldeilis ekki allt upp talið:

Þegar alþingi hefur samþykkt nýju ráðstafanirnar í gjaldeyrismálum má Litli-Jón kaupa húseign erlendis. Hugsið ykkur bara; hann má það! Litli-Jón. Þá losnar hann úr 170 þúsund króna mánaðarleigu fyrir kjallaraholuna sem hann hefur látið duga sér og sínu fólki til þess að geta sparað pening og lagt fyrir.

Þetta er stórkostleg kjarabót fyrir litla manninn; hamingjan brosir við honum, fjölskyldu hans og félögum öllum.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,733