Boltinn er hnöttóttur

Josef Herberger hefði orðið 117 ára um daginn ef hann hefði ekki látist langt fyrir aldur fram árið 1977.  Herberger var mikill spekingur og ef einhver kemst með tærnar þar sem heimspekingurinn Guðmundur Benediktsson er með hælana þá er hann.

Hann er þekktur fyrir beinskeyttan og einfaldan en áhrifamikinn stíl og eftir honum eru hafðar setningar sem súmmera á metafýsískan hátt allt sem skiptir máli í þessu flókna fyrirbæri sem fótboltinn er.

Dæmi:

„Leikurinn er 90 mínútur á lengd.“

„Ef maður veit ekki á hvern skal senda boltann, verður maður að setja hann í markið.“

Ein frægasta tilvitnun í Herberger er:

„Boltinn er hnöttóttur.“

Einhverjir myndu kannski vilja ekki hrósa Herberger fyrir athyglisgáfuna, en á bak við svona selvfölgeligheder leynist oft mikil analýsa og skilningur.

Það sem Herberger átti við var að hnöttóttur bolti getur skoppað í allar áttir. Það getur með öðrum orðum allt gerst í fótbolta.

Til dæmis gæti Glen Johnson kysst dolluna í lok tímabilsins.

Der Ball ist nefnilega rund!