Björn Valur gefur áfram kost á sér: Ég er ekki óumdeildur, en ég er engin Hanna Birna

Björn Valur Gíslason tilkynnti á flokksráðsfundi Vinstri grænna í gær að hann gæfi áfram kost á sér sem varaformaður flokksins. Kjörið fer fram á landsfundi flokksins í október.

Í ræðu sinni hvatti hann fleiri til að bjóða sig fram svo að ekki yrði sjálfkjörið í embættið. Hann endurtók þá hvatningu í sjónvarpsþættinum Eyjunni í dag og bætti við: „Ég veit að ég er ekki óumdeildur, en ég er engin Hanna Birna. Ég á ekki óvini innan flokksins.“

Björn Valur var kjörinn varaformaður á landsfundi árið 2013 um leið og Katrín Jakobsdóttir tók við formennsku af Steingrími J. Sigfússyni. Hann náði ekki kjöri á þing í kosningum sama ár.

Björn Valur hefur verið mjög ötull að skrifa um stjórnmál, svo að eftir hefur verið tekið, og mun meira en starfandi þingmenn flokksins. Hann er einn af föstum pennum Herðubreiðar.