Bjarni og Illugi segja Framsókn hafa komið í veg fyrir nauðsynlegar fjárveitingar til Ríkisútvarpsins

Bjarni Benediktsson og Illugi Gunnarsson komu því skýrt á framfæri við yfirstjórn Ríkisútvarpsins fyrir jól, að Framsóknarflokkurinn kæmi í veg fyrir að stofnunin fengi nauðsynlegt fé til rekstrar síns.

Þeir félagar sögðu Sjálfstæðisflokkinn reiðubúinn að treysta rekstur Ríkisútvarpsins, en að afstaða samstarfsflokksins væri svo hörð að við hann yrði ekki tjónkað. Þeir nefndu sérstaklega til sögunnar Sigmund Davíð Gunnlaugsson forsætisráðherra og Vigdísi Hauksdóttur formann fjárlaganefndar.

Þetta kemur fram í úttekt mánaðarritsins Stundarinnar á málefnum Ríkisútvarpsins, þar sem kennir ýmissa grasa.

Grein Stundarinnar, sem Jóhann Páll Jóhannsson skrifar og byggir á viðtölum við um 30 manns sem tengjast Ríkisútvarpinu, fjallar ekki síst um breytt andrúmsloft innan fyrirtækisins eftir ríkisstjórnarskipti, auknar tilraunir ráðamanna til afskipta af því og beinar og óbeinar hótanir stjórnarliða í garð einstaka starfsmanna, fyrr og nú.

Ofangreind skilaboð Bjarna og Illuga til yfirstjórnar Ríkisútvarpsins komu til umræðu á stjórnarfundi þess 22. janúar síðastliðinn, en þar var útvarpsstjóra og stjórnarformanni falið að ræða fjárhag þess við forsætisráðherra – ekki við fjármálaráðherra eða mennta- og menningarmálaráðherra, sem stofnunin heyrir þó undir.

Stjórnarformaðurinn úr Framsóknarflokknum, Guðlaugur G. Sverrisson, vildi á fundinum gera lítið úr þessari afstöðu flokksins, en hann hefur þó á stjórnarfundum iðulega lýst óánægju framsóknarmanna með efnistök og tilteknar umfjallanir í Ríkisútvarpinu.

Í Stundinni er rifjað upp að stjórnarformaðurinn Guðlaugur hefur reglulega síðustu misseri tjáð sig um málefni Ríkisútvarpsins, talað um „fréttamennsku RÚV“ í gæsalöppum og sagt að fréttastofan hefði Sigmund Davíð Gunnlaugsson „í sigtinu.“ Einnig er vísað í frétt Kjarnans um þá tillögu Guðlaugs, að Ríkisútvarpið flytti í húsnæði í eigu Mjólkursamsölunnar.

Margt fleira kemur fram í þessari úttekt Stundarinnar, sem kom út síðastliðinn föstudag.