Ritstjóri Herðubreiðar 24/03/2015

Bjargaði Sigríður Ingibjörg bæði Árna Páli og Samfylkingunni með formannsframboði sínu?

Árni Páll og Sigríður IngibjörgFæra má fyrir því rök að staða Árna Páls Árnasonar sem formanns Samfylkingarinnar væri enn veikari ef ekki hefði komið til framboðs Sigríðar Ingibjargar Ingadóttur.

Þetta skrifar Ómar S. Harðarson, fulltrúi á nýafstöðnum landsfundi flokksins, í grein í Herðubreið. Ómar bendir á nýlega breytingu á lögum flokksins, sem mælir fyrir um formannskjör þótt aðeins einn hafi lýst yfir framboði, og skrifar:

„Árni Páll hefði því aldrei orðið sjálfkjörinn, þótt einn hefði verið í framboði. Formannskosning hefði farið fram föstudaginn 20. mars, jafnvel þótt Sigríður Ingibjörg hefði setið á sér.

Nú er erfitt að vita hvernig formannskosning hefði farið með Árna Pál einan í framboði. Sagan er sjaldan sögð í þáskildagatíð. Líklegast er þó að mun færri hefðu greitt atkvæði — það var jú fyrirfram búið að dæma þennan landsfund sem daufan og óspennandi. Þá er alls ekki víst að Árni Páll hefði fengið meirihluta þeirra atkvæða sem þó hefðu verið greidd. Margir voru óánægðir með störf hans og hefðu annað tveggja, skilað auðu eða skrifað inn nafn einhvers annars.

Við slíkar niðurstöður hefði staða flokksins og formannsins orðið öllu verri en nú er.“

Sjá grein Ómars í heild hér.

Flokkun : Efst á baugi
2,589