ATVFM

Guðlaugur Þór Þórðarson, þingmaður Sjálfstæðisflokksins var kjörinn varaformaður Evrópusamtaka íhaldsmanna og umbótasinna (AECR) í maí 2015. Þá var hann varaformaður Sjálfstæðisflokksins. Í samtökum þessum er flokkur Erdoğan, forsætisráðherra Tyrklands og Pólski íhalds- og þjóðernisflokkurinn Lög og réttlæti, en hann hefur verið gagnrýndur fyrir grimmd af margri sort.

Guðlaugur er atvinnuvaraformaður (ATVFM). Sem slíkur vinnur hann að sjálfsögðu að hugðarefnum sínum og Erdoğans hins tyrkneska hvar sem hann hefur tök á. Guðlaugur er ATVFM fjárveitinganefndar alþingis. Þar hefur honum tekist að fjársvelta spítalana, almennatryggingakerfið og Ríkisútvarpið í anda „umbótasinnaðra“ íhaldsmanna.

Á meðan Guðlaugur Þór og samreiðarmenn hans lækka veiðigjöld og hátekjuskatt á efnafólki um miljarða á miljarða ofan hafa þeir lækkað barnabætur um 200 milljónir að raunvirði á þessu ári og vaxtabætur um tæplega 3,3 milljarða króna, en þessi stuðningur er meðal annars ætlaður til að hjálpa efnalitlu fólki að koma sér þaki yfir höfuðið. Árið 2013 var níu og hálfum milljarði varið í vaxtabætur frá ríkinu en 6,2 miljörðum í ár.

Guðlaugur Þór Þórðarson, ATVFM fjárlaganefndar, segir þetta fagnaðarefni. „Vaxtabætur eru í sjálfu sér slæmt form af stuðningi og ýta undir skuldsetningu,“ er haft eftir honum í vísi.is í dag, 04.07.’16.

Vegna þess mikla árangurs og þeirra miklu „umbóta“ sem ATVFM hefur náð er farið að hvísla um það í Valhöll hvort ekki sé kominn tími til að gera hann aftur að ATVFM Sjálfstæðisflokksins, jafnvel formanni, sökum vandræðalegrar tortryggni sem ríkir innan flokksins vegna Panamaskjalanna.