Ritstjóri Herðubreiðar 21/09/2016

Ástsæll útvarpsmaður gefur út bók: Við Steina Elena erum miklir vinir

Nafnið Guðni Már Henningsson þekkja allir sem komnir eru á giftingaraldur og hlusta á útvarp.gudni-mar-og-steina

Guðni hefur áratugum saman haft umsjón með margvíslegum þáttum á Rás 2, en er einkum þekktur fyrir Næturvaktina um helgar. Þar tekur hann á móti símtölum og óskalögum, og líklega er óhætt að fullyrða að sum þeirra samtala um miðja nótt séu ígildi háskólanámskeiðs í uppbyggilegum mannlegum samskiptum.

Enda á hann marga og dygga hlustendur. Og enda er útvarpsrödd hans öðrum fremur vingjarnleg.

Fyrir um fjórum árum eignuðust þau Maria Henningsson dótturina Steinu Elenu. Það er lífsreynsla fyrir mann sem er skriðinn rúmlega yfir fermingu og hafði mikil áhrif á Guðna Má:

„Flestallir foreldrar þekkja að börn segja oft skemmtilega frá og spyrja undarlegra og oft heimspekilegra spurninga. Líklega eru Aravísurnar sígildu besta dæmið um þetta,“ segir Guðni í samtali við Herðubreið og bætir við:

„Steina Elena er þar engin undantekning. Þegar hún var tveggja ára eða svo datt mér í hug að skrásetja hugrenningar hennar því ég treysti ekki stopulu minni mínu og ég var einnig viss um að þegar hún yrði eldri myndi hún, eins og önnur börn, spyrja mig um barnæsku sína.

Þessi augnablik eða sögur skráði ég fyrir hana, mig og mömmu hennar. Ég kunni engin önnur ráð til að varðveita þessar vangaveltur en að setja þær inn á facebook. Einhvern veginn vatt þetta upp á sig og ég fór að fá jákvæð viðbrögð við þessum litlu sögum. Fólk fannst eins og það þekkti Steinu litlu í gegnum þessar sögur og einnig upplifði það eigin æsku og sinna barna í frásögnunum. Ég fékk mjög miklar og jákvæðar undirtektir og ef það leið of langur tími á milli sagna fékk ég að heyra það!

Margir óskuðu eftir því að sögunum yrði safnað saman og út gefin bók. Fyrst fannst mér það fráleit hugmynd. Ég vissi ekki hvort að þetta væru barnasögur eða saga um litla stelpu og pabba hennar fyrir fullorðið fólk. Smám saman komst ég á þá skoðun að þetta gæti orðið að ágætustu bók, fyrir alla fjölskylduna.

Ég hef lært mikið af Steinu Elenu og vonandi lærir hún eitthvað af mér. Mestu skiptir þó hvað við erum góðir vinir.“

Sögurnar eru alls 65 og eru væntanlegar á bókinni Það er rafmagnslaust hjá selunum ef nógu margir taka þátt í forsölu á Karolina Fund, sem hefur fyrir löngu sannað sig sem vettvangur fyrir góð verkefni. Þar gefst kostur á kaupa bókina á lægra verði en í verslunum og tryggja um leið útgáfu hennar.

Veftímaritið Herðubreið er ekkert fyrir að auglýsa bækur eða annan varning ókeypis, en stundum þarf að gera undantekningar. Þessi bók er ekki aðeins falleg og fyndin, heldur uppfull með mannhlýju og á erindi við fólk á öllum aldri.

Til að kynnast bókinni betur og taka þátt í verkefninu nægir að smella hér.

Flokkun : Efst á baugi
1,070