Ritstjóri Herðubreiðar 03/06/2014

Áslaug: Þetta var ekki bara eitthvert skipulagsmál. Framsókn þarf að gera hreint fyrir sínum dyrum

„Mér finnst að borgarstjórnarhópur Framsóknar og flugvallarvina þurfi að skýra fyrir hvað þær standa, hvert er verið að fara. Það var verið að róa á ákveðin mið, og í umræðuþáttum um helgina eftir kosningarnar hefði alveg verið hægt að hreinsa, ef vilji hefði verið til þess, en það var ekki gert nógu skýrt,“ sagði Áslaug Friðriksdóttir borgarfulltrúi Sjálfstæðisflokksins í útvarpsþættinum Víðsjá í dag.Áslaug og Hjálmar

Þar ræddu þau Hjálmar Sveinsson borgarfulltrúi framgöngu Framsóknarflokksins í nýafstaðinni kosningabaráttu.

Aðspurð hvort stefna Framsóknarflokksins hefði áhrif á samstarf við hann sagði Áslaug:

„Við þurfum svo sannarlega að ræða þetta, hvert á að fara með þetta. Fyrst var talað um að þetta væri bara skipulagsmál, en síðan var það bara ekki alveg þannig.“

Hjálmar rifjaði upp sögu:

„Það sagði við mig reyndur maður stuttu eftir að prófkjör Samfylkingarinnar fór fram í febrúar, að Framsókn myndi hugsanlega fara í þann leik að koma með eitthvað útspil rétt fyrir kosningar sem myndi gera 90 prósent kjósenda brjálaða, en 10 prósent rosa ánægða. Það væri nóg. Og það er nákvæmlega það sem gerðist.“

Hjálmar sagði að spírall hefði myndast þegar málið kom fram svo skömmu fyrir kosningar og sigurvegararnir væru þeir sem settu það á dagskrá, „ekki sem eitthvað lítið skipulagsmál heldur sem meðvitaða strategíu, að fiska í þessu vatni og fá býsna stóran fisk á öngulinn, tveir borgarfulltrúar.“

Hann benti á að þessi umræða virtist einnig tengjast andúð á Evrópusambandinu. „Maður tekur eftir því að Morgnblaðið tekur upp alveg ótrúlega stefnu í þessu máli, hundskammar Sjálfstæðisflokkinn fyrir sína að mér fannst flottu kosningabaráttu, sem var öll á jákvæðum nótum og málefnaleg, og hrósar þeim sem gera út á þessa dapurlegu pólitík með þessum dapurlegu og ómerkilegu vinnubrögðum.“

Hægt er að hlusta á Víðsjá hér, en þessi umræða hefst þegar um 35 og hálf mínúta er liðin af þættinum.

Flokkun : Efst á baugi
1,276