Árétting

Þann 20. þessa mánaðar lagði ég fjórar spurningar fyrir ráðamenn þjóðarinnar; þá, eða þann þeirra, sem fyndi hjá sér þörf fyrir að svara. Þær báru yfirskriftina, Er Kaninn að koma? Engum virðist hafa orðið mál. Þess vegna ætla ég að gera þetta aftur. Nú beini ég spurningunum til þingflokks Vinstri grænna. Vg er (var) grænn vinstriflokkur eins og nafnið bendir til, flokkur sem er (var) á móti hverskyns hernaðarbrölti.

Spurningarnar spruttu vegna fréttar í Sjónvarpinu. Þar var meðal annars greint frá því að Bandaríkjaher og Nató ætli að fjárfesta fyrir 14 miljarða – fjögur þúsund miljónir króna – hér á landi á næstunni. Mest á Keflavíkurflugvelli. En einnig er ætlunin að lappa uppá gamlar og  úr sér gengnar ratsjárstöðvar á Vestfjörðum, Langanesi og á Stokksnesi. Á Vellinum ætlar bandaríski flugherinn svo ofan í kaupin að koma upp gámaíbúðum fyrir eitt þúsund hermenn.

Spurningarnar voru þessar og eru enn:

Var þetta sönn og rétt frétt í Sjónvarpinu?

Ef svo er, hver heimilaði þetta og þvíumlíkt?

Af hverju er þetta gert (ekki reyna að halda því fram að það sé til þess að verjast hernaðarinnrás)?

Þarf Alþingi ekki að fjalla um svona freklega innrás í þjóðlífið og er ekki rétt að hafa þjóðaratkvæðagreiðslu um þvílíkt mál?

Og þar sem spurningarnar eru nú bornar fram á flokkslegum grunni þarf að bæta aftan við spurningu tvö: 

Hvenær var þessi heimild veitt. 

Hvenær var hún kynnt fyrir þingflokknum.

Undir venjulegum kringumstæðum hefði ég spurt að þessu augliti til auglitis innan flokksveggja. En þar sem fleiri þurfa og vilja fá svar við þeim þykir mér rétt að fara þessa leið. Þá er líka horfinn sá möguleiki að hægt sé að mistúlka svörin. Þau þurfa að vera undanbragðalaus, svörin. 

Ef engin svör berast á næstu þremur dögum mun ég leggja spurningarnar fyrir einstaka þingmenn Vg á þessum miðli, eða fá þær birtar í öðrum fjölmiðlum ef svo undarlega vill til að hvorki þingmenn Vg né nýju aðstoðarmennirnir lesi Herðubreið.