trusted online casino malaysia
Jón Daníelsson 06/01/2015

Áhrif heimskunnar

LaeknarÞað þarf ekki endilega beinan illvilja til að koma illu til leiðar. Heimska getur dugað ágætlega. Og sé viljinn fyrir hendi er hægt að finna sér ýmislegt heimskulegt til dundurs. Til dæmis er almennt fremur heimskulegt að ljúga. Það kemst nefnilega oftast upp. Það er líka heimskulegt að þykjast. Fólk er yfirleitt nokkuð fljótt að sjá í gegnum það.

Samninganefnd lækna var búin að sitja á þykjustufundum hjá sáttasemjara frá því í júní, þegar samninganefnd ríkisins fékk loks umboð til að hefja raunverulegar viðræður viku fyrir jól. Og allt í einu mátti engan tíma missa. Nú var nefnilega hægt að semja án þess að gera ráð fyrir útgjöldunum í fjárlögum.

En þá kom í ljós að ýmislegt hafði breyst. Stöðug fundahöld með rispaðri grammófónplötu fara á endanum í taugarnar á fólki. Einhver þokkalega sanngjörn hækkun hefði kannski verið samþykkt með sæmilegum meirihluta í sumar. Nú er raunveruleg hætta á að tvöföld slík hækkun verði hreinlega felld.

Læknar eru orðnir langþreyttir í tvennum skilningi. Þeir eru sumir úrvinda af svefnleysi og löngum vöktum og þeir eru eðlilega hundfúlir yfir því viðmóti sem þeim er sýnt. Þeir eru sem sagt orðnir alvarlega reiðir og reitt fólk getur verið nokkuð erfitt viðureignar.

Auðvitað hefði átt að vera búið að semja við lækna fyrir a.m.k. hálfu eða jafnvel heilu ári. Það var heimskulegt að gera það ekki. Það er almennt heimskulegt að draga fólk á asnaeyrunum. Og nú fáum við að kenna á áhrifum heimskunnar.

Svo má auðvitað spyrja sig hvernig fólk með sjálfsvirðingu, geti fengið af sér að sitja í samninganefnd ríkisins og spila rispaða grammófónplötu í hálft ár. En það er kannski sæmilega borgað.

Flokkun : Pistlar
1,287