Úlfar Þormóðsson 23/09/2015

Afskræming

Forsíða DV 22-24. 09. 2015 er afar skýrt dæmi um eitraða fréttamennsku þar sem skynjun fólks er brengluð með ljósmynd og texta í þeim tilgangi að gera ósanna frétt trúlega. Með öðrum orðum: Það er verið að falsa frétt í ófrægingarskyni. Þetta er markviss tilraun til heilaþvottar.

Björn Ingi Hrafnsson

Það er rauðprentuð yfirfyrirsöng á fréttinni sem er fimmdálka: „Kveðjutillaga“ ógnar 17 miljarða fjárfestingu. Aðalfyrirsögnin, HÓTA AÐ HÆTTA VIÐ HÓTELIÐ, er prentuð með hvítum hástöfum ofan í fimmdálkamynd af hótelfjárfestunum ásamt borgarstjóra, en framan á bringuna á honum er spjald með rauðu letri. Þar stendur TJÁIR SIG EKKI .

Fréttina er hægt að nálgast á DV.is. Í henni er birtur partur úr tölvupósti frá Höskuldi Ólafssyni, bankastjóra Arionbanka, en hann hafði fengið orðsendingu frá íslenskum fjárfesti, nefndur Eggert, sem lýsti ótta sínum vegna samþykktar borgarstjórnar á tillögu um að sniðganga ísraelskar vörur sem framleiddar eru undir mannréttindabrotum. Bankastjórinn og fjárfestirinn höfðu áhyggjur „varðandi stöðu gyðinga í risastórri fjárfestingu og varðar byggingaframkvæmdir á Marriot hótelin á Hörpureitnum, og er metið upp á sautján milljarða“, segir blaðið og greinir síðan frá því að í pósti bankastjórans segi að ákvörðun meirihlutans sé „ákaflega óheppilegt og hygg ég að sambærilegt berist okkur í bankanum úr öðrum áttum vegna annarra verkefna,“ hvað í ósköpunum sem þessi málleysa hins óttaslegna bankamanns merkir.

Síðan er teygður lopinn með málkrókum og villurökum þar til kemur að þessu í þriðjudagsútgáfu blaðsins, undirstrikanir eru höfundar þessa pistils:

„Athygli vakti viðtal við Dag í Kastljósi á mánudaginn. Þar var hann spurður beint út í þetta mál varðandi fjárfestinguna. Þar voru svör hans nokkuð loðin, sé tekið mið af þeim upplýsingum sem liggja fyrir nú. Þannig sagði Dagur að fjölmiðlar hefðu spurst fyrir um þessa fjárfestingu á mánudeginum, og þá hafi fulltrúi Friedman haft samband við sig. Þá spurði Þóra Arnórsdóttir, ritstjóri Kastljóss: Þannig að hann ræddi ekkert við þig? Eða aðrir fjárfestar? Dagur svaraði einfaldlega: „Nei“. Hann bætti við að fulltrúi Friedman hefði sérstaklega viljað undirstrika að hann hefði fengið góðar og faglegar móttökur á Íslandi og fundist hann vera velkominn. Aðstandendur verkefnisins ætli að halda áfram með það og myndu ekki blanda sér í innanríkismál.

Þessi svör ríma illa við áhyggjur Eggerts, sem flokkast vissulega sem fjárfestir í verkefninu, og sendi Degi póst í gegnum bankastjóra Arion banka um helgina. Hugsanlega er Dagur þó að vísa til þessa pósts þegar hann segir að aðilar hafi lýst yfir áhyggjum sínum um helgina, þó þeir hafi ekki vitað hug þeirra sem hlut áttu að málinu.“

Eftir lestur á þessari dellu hlýtur lesandinn að spyrja sig: Til hvers er verið að birta frétt sem upplýsir sjálf að hún er uppspuni, rógur? Hvaða hagsmunum þjónar það? Getur verið að ástæðan tengist framsóknarvæðingu eignarhalsins á blaðinu?

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,837