Afréttari

Ásdís Halla Bragadóttir er stjórnarformaður fyrirtækis í heilbrigðisþjónustu sem rekur heilsuhótel. Hún kvartar undan því að umræða um einkarekstur í heilbrigðisþjónustunni sé ómálefnaleg, jafnvel andstyggileg. Vefmiðillinn Eyjan hefur eftir henni að „sumir kjósi að taka út einstaklinga og einblína á að þeir séu að græða í þeim tilgangi að gera starfsemina ómálefnalega“, hver svo sem merking þessara orða er.

Það kann að vera ómerkilegt af mér að taka til máls um þetta efni þegar ég skil hvorki hvað þessi talsmaður einkarekstrarins á við með orðunum „að græða í þeim tilgangi að gera starfsemina ómálefnalega“ né það sem hann bunar út úr sér í framhaldinu. En ég ætla samt að gera það.

Í „góðærinu“ svokallaða smíðaði frjálshyggjan verðmætastiku sem brugðið var á læknisverk. Að því loknu var sjálfstæðismaðurinn Guðlaugur Þór dubbaður upp í sæti heilbrigðisráðherra og gert að svelta heilbrigðisþjónustuna af fjármagni, svo að hún ætti æ erfiðara með að vinna kostnaðarsömustu verkin. Þau voru síðan boðin út og upp spruttu einkaklínikur sem til dæmis gera augnaðgerðir fyrir fromúur og heilsuhótel sem hýsa sjúka og fá greitt úr ríkissjóði fyrir vikið svo aðeins tvö dæmi séu nefnd. Æ fleiri þættir þjónustunnar hafa síðan ratað til einkaaðila því að peningasveltið stendur enn yfir. Þess vegna er heilbrigðisþjónustan nú í molum og getur ekki veitt þá hjálp sem borgararnir þarfnast og starfsfólk hennar kann að veita og vill veita.

Samtalið um heilbrigðisþjónustuna snýst um það hvort hún á að fara fram á einkastofum og spítölum reknum í hagnaðarskyni eða hvort ríkið eigi að reka hana og kosta af skattfé. Og það er hvorki ómálefnaleg né andstyggileg umræða. Samkvæmt könnunum sem gerðar hafa verið vill þorri Íslendinga að þessi þjónusta standi öllum til boða og sé rekin af hinu opinbera; landsmenn vilja ekki einkarekna læknisþjónustu.