Aflandsliðið

Peningavafstur Íslendinga erlendis er engin nýlunda. Skattsvik ekki heldur. Það er hins vegar nýtt að ráðherrar stundi hvort tveggja þetta eða búi sig í stakk til þess. Um aflandsfélög ráðherra og aðrar æfingar varðandi slík mál eru ekki öll kurl komin til grafar ennþá. Afleiðingar þessa eru því óljósar enn sem komið er. En það sýður á þjóðinni. Og sýnist sitt hverjum.

Björn Bjarnason, fyrrverandi ráðherra Sjálfstæðisflokksins er hneykslaður á Ríkisútvarpinu fyrir að vera að segja frá þessu. Honum finnst sem útvarpið sé að ofsækja ráðherrana og skrifar í bloggfærslu frá því í gærkveldi (29.03.´16): „Spurning er hver sé fréttin í þessu listamáli …“ (listamál = nafnbirting reikningseigenda – ath.úþ).

Baggalútur kemur að málinu úr annarri átt en Björn. Hann hefur þetta um málið að segja:

„Nánast er fullskipað í Af–landslið Íslands, en endanleg uppstilling verður kynnt á allra næstu dögum.

Liðið mun keppa fyrir Íslands hönd í ýmsum greinum, m.a. fjármálagerningum, undanskotum, fléttum og hverskyns reikningskúnstum.

Er liðinu spáð góðu gengi, enda skipað úrvals fólki úr efstu stigum þjóðfélagsins, með mikla reynslu.

Stífar æfingar fara nú fram á Jómfrúreyjum og því hefur eðlilega reynst erfitt að ná tali af þessu liði.“

Þetta er sannarlega ömurlegt mál. Og lágkúrulegt á allan hátt. En það gefur von um að við lifum þetta af sem þjóð og án þess að leggjast í þunglyndi á meðan Baggalútur hefur rödd.