Advice to JJ (1933-1978)

Eftir Hrafn Jökulsson

Allir þessir leigubílstjórar

Allar þessar konur sem hafa ekkert heimilisfang

Allir þessir menn sem sitja enn í rökkvuðu horni knæpunnar

 

Ekkert

nema árin

á milli okkar

ekkert nema lífið

og svo þessi dauði sem þeim verður

svo tíðrætt um

 

Ljóð brúa ekki bil

barnslegra spurninga

(Þú ortir þrjú ljóð eftir því

sem ég kemst næst: eitt var til Jörgens Jörgensen,

en einsog þú manst var Jörgen Jörgensen

fangavörður í sænsku fangelsi. Það var á ensku.

Annað var til danskrar stúlku sem þú elskaðir.

Ljóðið heitir advice to Judith.

Ég hef aldrei lesið það og aldrei hitt Judith.

Þriðja ljóðið sem þú ortir var nú bara til

Krúsjovs í orðastað skrifstofumanns í Vesturbænum.)

 

En þessi ljóð geta ekki svarað spurningunum

ekki gefið svörin

ekki frekar en leigubílstjórarnir

ástkonurnar eða vinir þínir sem enn sitja yfir glasinu

 

Nei

ég fann ekki einu sinni gröfina þína í kirkjugarðinum

og samt ertu allsstaðar ennþá

og þær stundir hafa komið að ég hef sagt vitlaust

til nafns í leigubílum eða einfaldlega þagað

 

Þú valdir auðveldustu leiðina

einsog svo margir sem gengu grýttan veg og

sáðu fræjum í frjóa jörð

 

Nú

ertu mynd í gömlu albúmi

ég á nokkrar af bókunum þínum

ljóðið til Krúsjovs er uppi á vegg

einu sinni hefur þú vitjað mín í draumi

 

Þú

sagðist vera farinn til landsins

sem fuglasöngurinn fer til þegar hann hljóðnar

 

mér finnst

ef ég má vera hreinskilinn

að þú hefðir átt að taka leigubílstjórana

ofmáluðu konurnar og barlómana með þér

 

fuglasönginn

hefðir þú betur skilið eftir

 

 

Hrafn Jökulsson (Húsinu fylgdu tveir kettir, 1991)