Aðdróttanir

Nafnleysinginn á Útvegs-Mogganum er í essinu sínu. Hann hefur átt nokkra góða daga án Guðnýjar og einbeitt sé að því að fara með þrugl og þylja skæting. Í Reykjavíkurbréfi dagsins í dag eys hann úr sér rangindum, skrökvar upp á starfsmenn ríkisútvarpsins, heldur áfram að falsa söguna og leggur auk þess á borð með sér aðdróttun í hæsta bragðflokki sem áhangendur hans geta smjattað á og boðið hverjum sem hafa vill að slefa yfir með óheftum tilgátum.

Í boðskap nafnleysingjans og útgerðarinnar þennan sunnudag er þetta að finna í hratinu:

„Ekki hefur verið að fullu upplýst hverjir fjármögnuðu þá byltingartilraun (Búsáhaldabyltingin, athugasemd undirritaðs.) eða skipulögðu hana frá degi til dags. Vísbendingar liggja þó fyrir um hvort tveggja.“

Það benda allar líkur til þess að nafnleysinginn sé blaðamaður á Útvegs-Mogganum. Sé það svo eyðir sá veruleiki stærstum hluta trúverðugleika blaðsins að hann skuli ekki upplýsa lesandann um málið. Það bendir eindregið til þess að nafnleysinginn sé lélegur blaðamaður.

Það er sjálfsagt ekki til neins að skora á nafnleysingja. Hann er skuggavera. Laumupúki. En. Það sakar ekki að prufa og hér með látið á reyna:

Skýrðu frá því hverjir fjármögnuðu byltinguna. Greindu frá nöfnum og upphæðum.

Það væri mannsbragur að því.

En kannski er það til of mikil mælst að nafnleysingi sýni dug.