Ritstjóri Herðubreiðar 11/06/2020

Að snúa út úr fyrir sjálfum sér

Karl Th. Birgisson skrifar

Bjarni Benediktsson hefur fundið alveg nýja aðferð til þess að stjórnmálamaður geti bjargað sér úr pólitískri klípu.

Við skulum ekki dvelja hér við efnisastriði þess máls, sem snýst um að fjármálaráðherra kom í veg fyrir að prófessor yrði ritstjóri fræðitímarits vegna stjórnmálaskoðana þess síðarnefnda.

Efnið dæmir sig sjálft. Stöldrum frekar við viðtal við Bjarna Benediktsson í Ríkisútvarpinu fyrr í kvöld.

Flestir svona skandalar eiga það sammerkt, að það er ekki efni þeirra heldur viðbrögðin, sem skipta mestu máli. Þegar stjórnmálamenn byrja að ljúga, snúa út úr og þvæla þangað til þeir hafa grafið sér holu, sem þeir komast ekki upp úr.

Bjarni virðist hafa lært af reynslunni og fundið lausn. Hún er að hafa tvær skoðanir. Eða snúa út úr fyrir sjálfum sér. Lítum á dæmi.

Í upphafi viðtalsins segir Bjarni að Þorvaldur Gylfason hafi verið óheppilegur í starfið vegna þess að hann hafi ekki stutt undanfarnar ríkisstjórnir. Meiraðsegja verið mikið á móti þeim.

Flestir myndu telja slíkt pólitískar skoðanir, en hálfri mínútu síðar bætir fjármálaráðherra við aðspurður: „Hver segir að hans pólitísku skoðanir skipti öllu máli?“ Þetta var örskömmu eftir að Bjarni nefndi þær sem einu ástæðuna fyrir því að hann beitti sér gegn Þorvaldi.

Eða voru það bara „afskipti“? Eða jafnvel alls engin afskipti?

Bjarni sakaði fjölmiðla nefnilega líka um rangfærslur í fréttum. Aðspurður hverjar þær hefðu verið svaraði hann: „Það eru rangfærslur þegar sagt er ítrekað í fréttum, að fjármálaráðuneytið hafi haft afskipti [með áherzlu á afskipti] af ráðningu Þorvaldar. Hvernig í ósköpunum geta menn komizt að þeirri niðurstöðu?“

Fréttamaðurinn virtist ekki kunna íslenzku og spurði Bjarna frekar, en þá greip fjármálaráðherrann inn í og sagði: „Afskipti eru ekki óeðlileg. Þau eru beinlínis skrifuð inn í ferlið.“

Þetta er snilldarráð, að senda bæði Bjarna og fjármálaráðherrann í viðtal.

Það er samt ekki fallega gert af fjármálaráðherranum, að snúa sífellt út úr fyrir þeim grandvara heiðursmanni sem Bjarni Benediktsson er.

0,725