trusted online casino malaysia
Svanfríður Jónasdóttir 22/01/2015

Að kjósa sig einhliða inn í ESB!

Það fer fátt meira í taugarnar á mér en þegar stjórnvöld halda að við séum svo vitlaus að hægt sé að bera hvaða dellu sem er á borð fyrir okkur. Núna reyna þau að hlaupa frá kosningaloforði um að þjóðin fái að kjósa um það hvort samningaviðræðum við Evrópusambandið verði slitið. Og þá er því borið við að réttara væri að kjósa bara beint um aðild. Nei, nei, ekki ljúka samningum, ekki gera samning, þess þarf ekki því þau segjast vita hvað er í pakkanum. Úff, hvílíkt rugl!

Það er ekki hægt að kjósa einhliða um aðild að Evrópusambandinu, ekki frekar enn að kjósa einhliða um aðild að ýmsum viðskiptasamningum eða -blokkum. Ef það væri hægt væru ýmis ríki sem hafa lengi haft fullan hug á að gerast aðilar að ESB fyrir löngu búin að kjósa sig inn. En nei, sorrý, það er ekki hægt. Það þarf nefnilega að gera samning og það er um hann sem kosið er. Þess vegna heita þetta samningaviðræður. Og þessi samningur er á milli viðkomandi ríkis og ESB fyrir hönd þeirra ríkja sem þegar eru aðilar að sambandinu. Þannig eru reglurnar og eftir þeim þurfa allir að fara, líka Ísland.

Já, það fer í taugarnar á mér þegar verið er að rugla umræðuna með svona vitleysu. Þetta mál er það mikilvægt að það kallar á annað er svona fíflagang, eða hvaða móttökur heldur fólk að það fengi hjá alþjóðasamfélaginu þegar það fréttist að Ísland ætlaði einhliða að kjósa sig inn í ESB, án samnings?

Nei, betra er að láta liggja, eða standa bara við kosningaloforðin og leyfa þjóðinni að ákveða framhaldið. Mögulega segir þjóðin að nú sé þetta gott, hún vilji engan samning og rétt að slíta viðræðum, og þá er það þannig. Mögulega vill þjóðin láta ljúka samningaviðræðum. Þeim verður þá einhvern tímann lokið með samningi, og sá samningur sem næst lagður fyrir þjóðina. Þá loks, á grundvelli þess samnings, getur þjóðin svarað því hvort hún vill aðild að ESB eða ekki

Flokkun : Pistlar
1,486