Að hugsa sér!

Það kom fram á fundi velferðarnefndar alþings í dag að Kristján Þór Júlíusson heilbrigðisráðherra mun berjast gegn frekari niðurskurði í heilbrigðisþjónustunni. Að hugsa sér! Þetta segir hann alveg hiklaust, maðurinn, til þess að bjarga heilbrigðiskerfinu, nú þegar  hundruð starfsmanna þess hafa sagt upp störfum, þar með taldir 260 hjúkrunarfræðingar á Landspítalanum einum.

Á sama fundi benti Páll Matthíasson, forstjóri Landspítalans á, að skorið hefði verið niður á spítalanum frá árinu 2001 fram að árinu 2014. Hann sagði spítalann þurfa meira fé og að nauðsynlegt væri að fjölga starfsmönnum. Og þetta er allt að verða að veruleika því að ráðherrann sagðist ætla að berjast gegn frekari niðurskurði í heilbrigðisþjónustunni.

Dv.is skýrði í dag frá stöðu greiningar á ADHD. Eins og margir vita er ADHD röskun á taugaþroska heilans og lýsir sér gjarnan með einbeitingarerfiðleikum, hvatvísi og ofvirkni. Biðtími eftir ADHD-greiningu á Landspítalanum eru átján til tuttugu mánuðir, segir Páll Magnússon sálfræðingur og forsvarsmaður greiningateymis sem sett var á fót árið 2012. Nú bíða 590 einstaklingar eftir greiningu. Teymið fékk 40 milljóna fjárveitingu árið 2013 en hvorki krónu í ár né í fyrra. Og þetta er líka í góðu lagi: Kristján Þór Júlíusson heilbrigðisráðherra mun berjast gegn frekari niðurskurði í heilbrigðisþjónustunni.

Samkvæmt fréttatilkynningu hefur Standard & Poor‘s hækkað lánshæfiseinkunn Arion banka, Landsbankans og Íslandsbanka. Hækkunin setur bankana alla í fjárfestingarflokk. Þá hefur S&P einnig hækkað matseinkunn Tryggingamiðstöðvarinnar.

Hér leikur sum sé allt í lyndi og heilbrigðisráðherra mun berjast gegn frekari niðurskurði í heilbrigðisþjónustunni.