Á þinn kostnað

Fjármálaráðherra hefur sýnt forsætisráðherra meiri þolinmæði en títt er í samstarfi stjórnmálaflokka. Forsætisráðherra hefur fimbulfambað um ýmis mál sem fjármálaráðherrann fer með. Nægir þar að nefna ótímabærar og ýktar yfirlýsingar hans um miljarðastreymi út þrotabúum bankanna yfir í ríkissjóð. Fjármálaráðherra hefur staðið þetta af sér og í stað þess að rjúfa stjórnarsamstarfið heldur hann við heitstrengingu þeirra um að halda saman allt kjörtímabilið.

Á dögunum birti Styrmir Gunnarsson grein á netinu þar sem hann veltir því fyrir sér – eða ýjar að því – eftir því hvernig lesið er, að Framsóknarflokkurinn sé að búa sig undir að slíta stjórnarsamstarfinu við Sjálfstæðisflokkinn. Skoðun sína byggir hann meðal annars á því hversu þversum frammararnir eru í ýmsum áhugamálum Sjálfstæðisflokksins og því að þeir séu farnir að boða til kynningafunda um framsóknarstefnuna með lúðrablæstri.

Þetta kann vel að vera rétt hjá Styrmi því að nú sjást tvö ný teikn á lofti um þetta. Forætisráðherra hefur tekið sér aðstoðarmann, fyrrverandi kosningastjóra Eyglóar Harðardóttur, og utanríkisráðherra hefur gert það sama; tók til sín barnungan mann, sem líka hefur verið kosningastjóri. Að sjálfsögðu eru þeir báðir á launum hjá ríkinu.

Þegar ríkisstjórn er jafn óvinsæl eins og þessi mun sá flokkur sem slítur samstarfinu tvímælalaust hafa betur í kosningum en hinn sem skilið er við. Þetta ætlar forsætisráðherrann að nýta sér. Hann ætlar að svíkja félaga sinn. Þess vegna taka ráðherrar Framsóknar sér aðstoðarmenn. Kosningastjóra. Setja þá á launaskrá ríkinu með það fyrir augum að heyja kosningabaráttu sína á okkar kostnað; á þinn kostnað.